قازاقستان داعدارىس سالقىنىن سەزىنبەۋى ءۇشىن ءار تەڭگە ءتيىمدى پايدالانىلۋى كەرەك - ب. ساپاربايەۆ

استانا. قازاقپارات - كەشە ق ر پرەمەر- ءمينيسترىنىڭ ورىنباسارى بەردىبەك ساپاربايەۆ باستاعان توپ جۇمىس ساپارىمەن باتىس قازاقستان وبلىسىندا بولدى.

ۆيسە- پرەمەرمەن بىرگە وڭىرگە دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا، ءبىلىم جانە عىلىم ءمينيسترى اسلان ءسارىنجىپوۆ، ءبىرقاتار كوميتەتتەر مەن دەپارتامەنت باسشىلارى كەلدى.

 وبلىس اكتيۆىمەن كەزدەسۋدە ب. ساپاربايەۆتىڭ اتاپ وتكەنىندەي، مۇنداعى ماقسات - ەلباسى تاپسىرماسىنا سايكەس جەرگىلىكتى جەردە مەملەكەتتىك باعدارلامالاردىڭ قالاي ورىندالىپ جاتقاندىعىمەن تانىسۋ. ءار سالاداعى جەتىستىكتەردى سارالاي وتىرىپ، كەيبىر كۇردەلى ماسەلەلەردى شەشۋ جاعىن قاراستىرۋ. ماسەلەن، ءبورلى اۋدانى بەرەزوۆ اۋىلىندا ورىن العان بالالاردىڭ جاپپاي ۋلانۋىنا بايلانىستى تۇرعىندارمەن كەزدەسۋ وتكىزىلىپ، مينيسترلىكتەر مەن وبلىس اكىمدىگىنە ناقتى تاپسىرمالار بەرىلدى. بۇل رەتتە اۋىل تۇرعىندارى تولىق تەكسەرۋدەن وتەدى. ق ر ەنەرگەتيكا ءمينيسترىنىڭ ءبىرىنشى ورىنباسارى ۇزاقباي قارابالين باسشىلىق ەتەتىن رەسپۋبليكالىق كوميسسيا 20 - قاڭتارعا دەيىن بارلىق تەكسەرۋلەردى اياقتاپ، قورىتىندىسىن مالىمدەيتىن بولادى.

بەردىبەك ماشبەك ۇلىنىڭ ايتۋىنشا، ەلباسىمىز الەمدەگى داعدارىستى كورەگەندىكپەن الدىن الا ەسكەرە وتىرىپ، ءداستۇرلى جولداۋدى ادەتتەگىدەن ەرتەرەك جاريا ەتتى. وسىعان بايلانىستى ۇكىمەت جەتى نەگىزگى باعىت بويىنشا ءوز ەسەپ- جوسپارلارىن جاسادى. ول جۇزەگە اسقاندا، 4 مىڭعا جۋىق جۇمىس ورنى اشىلادى. ەڭ باستى مىندەت - ۇلتتىق قوردان بولىنەتىن 737 ميلليارد تەڭگەنى ورنىمەن، ءتيىمدى جۇمساۋ. سوندا قازاقستان الەمدىك داعدارىس سالقىنىن ونشا سەزىنبەيتىن بولادى.

 باتىس قازاقستان وبلىسىندا، قاي سالادا بولسىن، دامۋ بار، جالپى ىشكى ءونىم كولەمى ءوسىپ كەلەدى. جۇمىسسىزدىق دەڭگەيى 4,7 پايىزدى قۇرايدى، بۇل رەسپۋبليكالىق كورسەتكىشتەن تومەن. دەگەنمەن الداعى كەزەڭدە از قامتىلعان، جۇمىسسىز جانە مۇگەدەك ازاماتتارعا باسا كوڭىل ءبولىنۋى كەرەك. الەۋمەتتىك تولەمدەر تومەندەمەۋى قاجەت. قازىرگى سۇرانىسقا، جاڭادان اشىلىپ جاتقان ءوندىرىس ورىندارىنا ساي كەلەتىن ماماندار دايارلاۋ ەستەن شىقپاۋى ءتيىس.

جالاقى تولەمەۋشىلىككە جول بەرەتىن جۇمىس بەرۋشىلەردەن قاتاڭ سۇرالىپ، وسى ورايدا زاڭ مەن ەڭبەك تالاستارىن رەتتەۋ تەتىكتەرىن جەتىلدىرۋ قاجەت. قاراشىعاناق سەكىلدى ءىرى كەن ورىندارىندا قازاقستاندىق ۇلەستى ارتتىرىپ، شاعىن جانە ورتا بيزنەستى بارىنشا قولداۋ باعىتىندا قاجەتتى شارالار المايىنشا بولمايدى. «ەڭ باستىسى، ەلباسى باستاماسىمەن قولعا الىنعان مەملەكەتتىك باعدارلامالاردىڭ بارلىق جەردە ورىندالۋىنا جەتىسۋ قاجەت» ، دەپ ءتۇيدى ويىن ۇكىمەت باسشىسىنىڭ ورىنباسارى.

اكتيۆ جيىنىندا وبلىس اكىمى نۇرلان نوعايەۆ پرەزيدەنت تاپسىرمالارىنا سايكەس وڭىردە اتقارىلىپ وتىرعان جۇمىستارعا توقتالسا، ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا مەن ءبىلىم جانە عىلىم ءمينيسترى اسلان ءسارىنجىپوۆ ءوز سالالارى بويىنشا الدا تۇرعان مىندەتتەردى تارقاتىپ ايتىپ بەردى.

 ب. ساپاربايەۆ ب ق و- عا ساپارى بارىسىندا ورالدا ۇلتتىق جيھاز دايىندايتىن «عيبادات» ج ش س جۇمىسىمەن تانىستى. نەگىزىنەن مۇمكىندىگى شەكتەۋلى ازاماتتار جۇمىس جاسايتىن كاسىپورىندا جەتپىستەن استام جيھاز شىعارىلادى. مۇنىڭ جۇمىسىنا وڭ باعا بەرگەن ۇكىمەت باسشىسىنىڭ ورىنباسارى سونداي- اق زاچاگان كەنتىندەگى №10 ورتا مەكتەپ پەن جۋىردا ىسكە قوسىلعان «زاڭعار» بالاباقشاسىندا بولدى.