سەنات ءتوراعاسى ەلىمىزدىڭ بەلگىلى مەملەكەت جانە قوعام قايراتكەرلەرىمەن كەزدەستى
ق. توقايەۆ قازاقستان رەسپۋبليكاسىنىڭ مەملەكەتتىگى مەن ەگەمەندىگىن نىعايتۋعا، ۇلتتىق زاڭناما جۇيەسىن جەتىلدىرۋگە جانە قازاقستاندىق پارلامەنتاريزمدى دامىتۋعا قوسقان قوماقتى ۇلەسى ءۇشىن ءادىل احمەتوۆ، ورالباي ابدىكارىموۆ، ومىربەك بايگەلدي، تىلەۋحان قابدراحمانوۆ، ءابىش كەكىلبايەۆ، كەنجەعالي ساعاديەۆ، سەرگەي تەرەشەنكو، ساعىنبەك تۇرسىنوۆ، راۆيل شىردابايەۆ، زينايدا فەدوتوۆا جانە سەيىلبەك شاۋحامانوۆتى قازاقستان رەسپۋبليكاسى پارلامەنتى سەناتىنىڭ قۇرمەت گراموتاسىمەن ماراپاتتادى.
سەنات ءتوراعاسى ماراپاتقا يە بولعان جانداردىڭ تاۋەلسىز قازاقستاننىڭ ومىرىندە ەرەكشە ورىن الاتىنىن ايتا كەلىپ، قازاقستان مەملەكەتتىلىگىن نىعايتۋعا ىقپال ەتكەن تاريحي شەشىمدەردى قابىلداۋعا ولاردىڭ قوماقتى ۇلەس قوسقانىن اتاپ ءوتتى.
«سىزدەردىڭ بەلسەندى ازاماتتىق كوزقاراستارىڭىز، اسا ماڭىزدى قوعامدىق جوبالاردى ىسكە اسىرۋعا، جەتكىنشەك ۇرپاقتى وتانشىلدىققا تاربيەلەۋ ۇدەرىستەرىنە ناتيجەلى قاتىسۋلارىڭىز جانە سىزدەردىڭ جاستارعا كومەك قولىن سوزۋعا شىنايى ۇمتىلىستارىڭىز زور قۇرمەتكە لايىق»، - دەدى سەنات ءتوراعاسى.
كەزدەسۋگە قاتىسۋشىلار مەملەكەت باسشىسى ن. نازاربايەۆتىڭ «نۇرلى جول» جولداۋىن تالقىلادى. «قۇجاتتا قارقىندى دامىپ كەلە جاتقان مەملەكەت رەتىندە جاھاندىق داعدارىستان شىعۋدىڭ دايەكتى جوسپارى مازمۇندالعان. ورتالىق ازياداعى جەتەكشى مەملەكەتتىڭ داعدارىسقا قارسى شارالارىنا حالىقارالىق قارجى ينستيتۋتتارى دا، بەدەلدى ساراپشى توپتارى دا ءجىتى نازار اۋدارىپ وتىر»، - دەپ اتاپ ءوتتى سەنات ءتوراعاسى.
اۆتور: سەرىك قاراجان
