مۋزەي جادىگەرلەردى ساقتايتىن قويما ەمەس، ونى ۇلكەن عىلىمي ورتالىققا اينالدىرۋ كەرەك - د. مىڭباي
«مۋزەي ەكسپوناتتار مەن جادىگەرلەردى ساقتايتىن قويما ەمەس. ونى ۇلكەن عىلىمي ورتالىققا اينالدىرۋ كەرەك. ۇلتتىق مۋزەيدىڭ اشىلۋى جاڭا كەزەڭگە جول اشىپ بەرگەندەي. قازىر بۇل باعىتتا ايتارلىقتاي جۇمىس جۇرگىزىلۋدە. ماسەلەن، مەملەكەتتىك ليتسەنزيا الىندى، ەلەكتروندى عىلىمي كىتاپحانا جۇمىس ىستەۋدە. وسى ورايدا سىزدەردىڭ تاراپتان وسىعان دەگەن بەلسەندىلىك قاجەت. قازىر مۋزەي عىلىمىنىڭ قادىرى مەن ماشاقاتىن تۇسىنەتىن عالىمدار قالىپتاسىپ كەلەدى. مۇنىڭ ءبارى ءوز جەمىسىن بەرەدى دەپ ويلايمىن»، - دەدى دارحان مىڭباي. ونىڭ ايتۋىنشا، ءسان-سالتاناتى جاعىنان ۇلتتىق مۋزەيدىڭ عيماراتى دۇنيە جۇزىندەگى عاجايىپ مۋزەيلەردىڭ العاشقى وندىعىنىڭ ورتاسىنان ويىپ تۇرىپ ورىن الدى.
«وزدەرىڭىز بىلەسىزدەر، استانالىقتار تەگىندە ات قويعىش-اق: باسقالاردى قايدام، ءبىزدىڭ مۋزەيگە قاتىستى «ايسبەرگ» دەگەن اتاۋ ءوزىمنىڭ كوڭىلىمە قونادى. راسىندا دا عاجايىپ عيماراتتىڭ سىرتقى كەلبەتى، ونىڭ «ىشىنە بۇككەن» باعا جەتپەس مول قازىناسىنىڭ كورنەكى ايعاعىنداي عانا. ول ءوزىنىڭ اسەم بولمىسىمەن كەلۋشىلەردى الىستان-اق باۋراپ الىپ، تورىنە وزعان كوزى قاراقتى كورەرمەنگە حالقىمىزدىڭ قيلى شەجىرەسىنەن ونەگەلى سىر شەرتەدى. سوندا ەڭبەككەر، باتىر، ونەرپاز، نامىسقوي اتا-بابالارىمىز تۇلەتكەن ۇلى دالا كوز الدىمىزدا كوسىلىپ سالا بەرەدى»، - دەيدى مۋزەي باسشىسى.
توقتالا كەتەتىن جايت، سالتاناتتى شارا اياسىندا «ۇلت مۇراتى» جانە «ۆوزروجدەننىە سوكروۆيشا كازاحستانا» اتتى قوس كىتاپتىڭ تۇساۋى كەسىلەدى. «بەلگىلى عالىمدار جازعان ەڭبەكتەردە ارعى ءتۇبى بوتاي، بەعازى- ءداندىباي داۋىرلەرىنەن باستالىپ، ساق، عۇن وركەنيەتتەرىنە ۇلاسىپ وتىر. كوك تۇركتەرگە، التىن وردا، قازاق حاندىعىنا جالعاسقان ەلدىك، مەملەكەتتىك تاريحىمىز جان- جاقتى ءسوز قوزعالدى. ءارى بابالارىمىز قۇرعان بايىرعى پاتشالىقتار، قاعاناتتار مەن ۇلىستارعا قاتىستى ايعاقتى مىسالدار ۇلتتىق مۋزەيدەگى قۇندى جادىگەرلىكتەردىڭ جارقىن دايەكتەرى ارقىلى زەردەلەندى. مۇندا كورسەتىلگەن قازىنالاردىڭ باسىم بولىگى «مادەني مۇرا» ۇلتتىق باعدارلاماسى اياسىندا جاڭعىرعان جايى بار»، - دەدى د. مىڭباي.
اۆتور: قانات مامەتقازى ۇلى
