ەلوردانىڭ «اۋە قاقپاسىن» تۇبەگەيلى وزگەرىستەر كۇتىپ تۇر
سونىڭ ىشىندە استانا حالىقارالىق اۋەجايىنىڭ الەۋەتىن ارتتىرۋ ءۇشىن مەملەكەت باسشىسى 2015 -جىلى جاڭا تەرمينال مەن ۇشىپ- قونۋ الاڭىنىڭ قۇرىلىسىنا 29 ميلليارد تەڭگە ءبولۋدى جۇكتەگەن.
«قازاقپارات» ءتىلشىسى وسى جانە وزگە ماسەلەلەرگە قاتىستى «استانا حالىقارالىق اۋەجايى» ا ق باسقارما ءتوراعاسى قايرات جاۋحانوۆپەن سۇحباتتاسقان بولاتىن.
- قايرات كەنەسبەك ۇلى، استانا اۋەجايىنىڭ جاڭا تەرمينالىنىڭ قۇرىلىسى قاشان باستالادى، قاشان اياقتالادى؟ ول پايدالانۋعا بەرىلسە، قانشا جولاۋشى قابىلداۋعا مۇمكىندىك تۋادى؟
- جاڭا تەرمينالدىڭ قۇرىلىسى 2015 -جىلى باستالادى دەپ جوسپارلانۋدا. پايدالانۋعا 2016 - جىلى بەرىلەدى. بۇدان كەيىن استانا اۋەجايى قاربالاس ساتتەردە 1775 ادامعا دەيىن قىزمەت كورسەتە الادى. ال جىلىنا 7 ميلليون جولاۋشى وتەدى. بۇل اۋەجايدىڭ وتكىزۋ الەۋەتى ەكى ەسەگە ارتادى دەگەن ءسوز.
- جاڭا تەرمينالدا قانداي تەحنولوگيالار بولادى؟ قازىر يننوۆاتسيا بارلىق جەرگە ەنگىزىلىپ جاتىر عوي.
- تەرمينال حالىقارالىق ستاندارتتارعا جاۋاپ بەرەتىن بولادى. 2017 - جىلى ءوزىن- ءوزى تىركەۋدەن وتكىزۋ ورىندارى اشىلادى. بۇل حالىقتىڭ ۇشار الدىنداعى پروتسەدۋرالاردىڭ جىلدام وتۋىنە سەپتەسەدى. ول جۇكتەردى باقىلاۋ جانە باسقارۋدىڭ ەڭ وزىق جۇيەسى - BRS (Baggage Reconciliation System) جۇيەسىمەن جابدىقتالماق. ول جۇكتەرمەن جۇمىس جاساۋ بارىسىندا قاتەلىكتەردى بولدىرمايدى ءارى بىرشاما ۋاقىت ۇنەمدەيدى. بۇل جۇيە تولىعىمەن اۆتوماتتاندىرىلعان. سونىڭ نەگىزىندە جۇكتى وزگە رەيسكە سالىپ جىبەرۋ دەگەن بولمايدى. سونىمەن قاتار اۋەجاي ارنايى تەحنيكالار ساتىپ الادى. ۇشاق تۇراقتارىندا اۆتوماتتاندىرىلعان جانار- جاعارماي قۇيۋ بەكەتتەرى بولادى. اۋە كەمەلەرى بىردەن سول جەرلەردەن جانار- جاعارماي قۇيىپ، ۋاقىت ۇتادى. بۇنىڭ بارلىعى بولاشاق تەرمينالدىڭ بارلىق جاڭالىقتارى ەمەس.
سونىمەن قاتار كەلەسى جىلى ۇشىپ- قونۋ الاڭى جاڭارتۋ كوزدەلۋدە. سوندىقتان ۇشاقتاردىڭ ۇشۋ كولەمى ازاياتىندىعىن ايتا كەتەيىن.
- بۇل جوسپارلار تىكەلەي ەكسپو-2017 شاراسىنىڭ وتكىزىلۋىنە بايلانىستى ەكەنىن بىلەمىز. وسىعان وراي، حالىقارالىق اۋەكومپانيالار استاناعا جاڭا رەيستەر اشۋدى جوسپارلاپ جۇرگەن جوق پا؟
- قازىرگى ۋاقىتتىڭ وزىندە قازاقستاننىڭ بارلىق ايماقتارىنان استاناعا جەتۋگە بولادى. ونداي رەيستەر ەكسپو-2017 شاراسىنا كەلۋگە ىنتا بىلدىرگەن وتانداستارىمىزدىڭ اعىنىنا جەتەدى. اۋەكومپانيالارى استانادان ۇشاتىن رەيستەردىڭ جيىلىگىن ارتتىرۋدى جانە جاڭا باعىتتاردى اشۋدى جوسپارلاۋدا. استانا اۋەجايى باسقا دا جاڭا اۋەكومپانيالاردى تارتۋ جۇمىستارىمەن اينالىسۋدا. ايتا كەتۋ كەرەك، ءبىز ءارقاشان ىقپالداستىققا اشىقپىز، تيىستى ينفراقۇرىلىمىمىز بار، اۋەجاي ۇشاقتاردىڭ بارلىق ءتۇرىن قابىلداي الادى.
- ماڭىزدى سۇراقتاردىڭ ءبىرى ول - ۇسىنىلاتىن قىزمەتتىڭ ساپاسى. اۋەجاي باسشىلىعى قىزمەتتىڭ ساپاسىن ارتتىرۋ باعىتىندا قانداي شارالار جاساۋدا؟
- استانا اۋەجايى ءۇشىن جولاۋشىلار مەن ءبىزدىڭ ايلاقتى پايدالاناتىن اۋە كومپانيالارعا كورسەتىلەتىن قىزمەتتىڭ ساپاسى بىرىنشى كەزەكتە تۇرادى. ەڭ ۇزدىكتەردىڭ قاتارىندا بولۋعا تالپىنامىز. سوڭعى جىلدارى جولاۋشىلارعا ىڭعايلى بولۋ ءۇشىن ءبىرقاتار جاڭا قىزمەتتەر ەنگىزدىك. وعان جاڭا قوعامدىق تاماقتانۋ ورىندارىن، رەيستەر تۋرالى مالىمەتتەردى كورسەتەتىن ۇشۋ اقپاراتىن ۇسىنۋدىڭ جاڭا جۇيەلەرىن، استانا اۋەجايى سايتىنىڭ جاڭا ديزاينىن، ۇشار الدىنداعى باقىلاۋ الاڭدارىن ۇلكەيتۋدى, بيزنەس- كلاسس ءۇشىن اسا جايلى «شاڭىراق» زالىنىڭ اشىلۋىن، مۇمكىندىگى شەكتەۋلى ادامدارعا ارنالعان ينفراقۇرىلىمداردى، تاكسي ورىندارىنىڭ اشىلۋىن، باج سالىعىنسىز ساۋدا جۇرگىزەتىن دۇكەندەردىڭ كوبەيتىلۋىن جاتقىزۋعا بولادى. ءبىزدىڭ اۋەجاي تۇتىنۋشىلار قۇقىقتارىن قورعاۋ كوميتەتىنىڭ وتىرىستارىنا قاتىسادى. مۇنداي تاجىريبە كورسەتىلەتىن قىزمەتتەردىڭ ساپاسىن سارالاۋعا سەپ بەرەدى.
- استانادا كۇننەن كۇنگە حالىق سانى ارتۋدا. كەلەتىن مەيماندار دا از ەمەس. اۋەجايدان قالاعا قاتىنايتىن قوسىمشا قوعامدىق كولىك باعىتتارىن قوسۋ جوسپاردا بار ما؟
- ءيا، استانا اۋەجايىندا جولاۋشىلار اعىنى كوبەيىپ كەلەدى. بۇل قۋانتارلىق جاعداي. 2013 - جىلى اۋەجاي 2,6 ميلليون ادامعا قىزمەت كورسەتتى. وسى ورايدا، جولاۋشىلار سانى ارتقاندىقتان، اۋەجاي مەن قالا اراسىنداعى كولىكتىك قاتىناس دامي تۇسپەك. مىسالى، بيىل اۋەجاي مەن تەمىرجول اراسىندا قاتىنايتىن ەكسپرەسس- مارشرۋت ەنگىزىلدى.
- سۇحباتىڭىزعا راحمەت!
اۆتور: جاسۇلان جولدىبايەۆ
