ن. نازاربايەۆ «ارسەلور ميتتال» ەڭبەككەرلەرىنىڭ الەۋمەتتىك جاعىنان قامتىلۋىنىڭ ماڭىزدىلىعىن اتاپ ءوتتى

استانا. قازاقپارات - ەلباسى نۇرسۇلتان نازاربايەۆ «ارسەلور ميتتال» كومپانياسىنىڭ ءتوراعاسى ءارى باس اتقارۋشى ديرەكتورى لاكشمي ميتتالدى قابىلدادى، دەپ حابارلايدى اقوردانىڭ باسپا ءسوز قىزمەتى.

كەزدەسۋ بارىسىندا كومپانيانىڭ قازاقستانداعى قىزمەتىنىڭ نەگىزگى باعىتتارى تالقىلاندى.

مەملەكەت باسشىسى «ارسەلور ميتتال» جۇمىسىنىڭ وڭ ناتيجەلەرىنە توقتالدى.

- جالپى، كومپانيا شىعاراتىن ونىمدەرگە دەگەن باعانىڭ كوتەرىلۋى ناتيجەسىندە كورسەتكىشتەردىڭ جاقسارۋى، تابىستىڭ كوبەيۋى بايقالۋدا. نەگىزگى ستراتەگيالىق مىندەت بۇرىنعىسىنشا بولات ءوندىرىسىن 6 ميلليون تونناعا دەيىن ۇلعايتۋ بولىپ قالا بەرمەك، - دەدى نۇرسۇلتان نازاربايەۆ.

قازاقستان پرەزيدەنتى سونداي-اق كومپانيادا جۇمىسپەن قامتىلعان ەڭبەككەرلەردى الەۋمەتتىك تۇرعىدان قولايلى جاعدايلارمەن قامتاماسىز ەتۋدىڭ ماڭىزدىلىعىنا نازار اۋداردى.

- قازىر ەڭ باستى نارسە - وندىرىستە جۇمىس ىستەيتىندەردىڭ الەۋمەتتىك كوڭىل-كۇيى. مەنىڭ تەمىرتاۋلىق مەتاللۋرگتەرمەن جانە قاراعاندىلىق كەنشىلەرمەن قارىم-قاتىناسىم ەرەكشە. سوندىقتان، جۇمىس ورىندارى قىسقارىپ، جالاقى تولەنبەي جاتسا، ولار تىكەلەي ماعان حابارلاسادى، - دەدى نۇرسۇلتان نازاربايەۆ.

ل. ميتتال كومپانيا ينۆەستيتسيالاردى ەسەلەۋ ارقىلى ءوندىرىستى دامىتۋدى جالعاستىرىپ جاتقانىن ايتتى.

- الەمدىك ەكونوميكاداعى تۇراقسىزدىققا قاراماستان، «ارسەلورميتتال تەمىرتاۋ» قىزمەتى سوڭعى 4 جىلدا ۇدايى كەڭەيىپ وتىردى. ءبىز جىلىنا ورتا ەسەپپەن 350 ميلليوننان 400 ميلليون دوللارعا دەيىن ينۆەستيتسيا سالدىق. دومنا پەشتەرى مەن ورتالىق زاۋىتتاعى ءوندىرىستى جاقسارتىپ، اياسىن كەڭەيتۋ جۇمىستارىن جالعاستىردىق، - دەدى كومپانيا باسشىسى.

سوڭىندا كومپانيانىڭ ەل ەكونوميكاسىنداعى ماڭىزدى ءرولى مەن ونىڭ يندۋستريالىق- يننوۆاتسيالىق دامۋ باعدارلاماسىنىڭ ەكىنشى بەس جىلدىعىنا قاتىسۋىنىڭ قاجەتتىگى اتاپ ءوتىلدى.