مەن وقىرماندى ءۇش تۇرگە بولەمىن - دۋمان رامازان، جازۋشى
داڭقىن ارتتىرسىن، اتاقتى بولسىن، سىيلىق السىن دەمەيتىن شىعار! حالقىنىڭ ويىن ايتسىن، تاعدىر- تالايىن جازسىن، تاريحىن تاڭبالاسىن، ساناسى مەن ويىنا قوزعاۋ سالسىن! مىنە، قالامگەردىڭ ەڭ باستى ۇستانىمى وسى بولۋى كەرەك! سوندىقتان وزىڭە- ءوزىڭ سىن كوزبەن قاراۋدى ۇيرەنىپ، جازۋدىڭ جاۋاپكەرشىلىگىن سەزىنگەندە عانا، الدىڭا قويعان ماقساتىڭا جەتە الاسىڭ.
ءبىز وسى جاۋاپكەرشىلىكتى سەزىنە الامىز با، سەزىنىپ ءجۇرمىز بە؟ ارينە، ءوزىن- ءوزى سىيلايتىن قالامگەرلەر جازۋدىڭ جاۋاپكەرشىلىگىن تولىق سەزىنەدى، نە جازسا دا جاقسى جازۋعا، حالتۋرا جاساماۋعا بارىن سالادى. قولىنا قالام ۇستاعاندار شەتىنەن كلاسسيك ەمەس، ءبارى بىردەي حاس ۇلگى تۋدىرا المايدى. اركىم ءوزىنىڭ دارەجە- دەڭگەيىنە قاراي شىعارما جازادى. ال ونىڭ باعاسىن بەرەتىن - حالىق.
مەن وقىرماندى ءۇش تۇرگە بولەمىن، ءبىرىنشىسى - شىعارمانى تەك قىزىق ءۇشىن وقيدى، قىزىقتىرماسا، باستاماي جاتىپ تاستاي سالۋى مۇمكىن، ەكىنشىسى - سول شىعارمانىڭ جازىلۋى مەن كوركەمدىگىن، وقيعاسى مەن مازمۇنىن باعالاپ، پىكىر ايتادى، ار جاعىنا وي جۇگىرتە المايدى، ال ءۇشىنشىسى - ەڭ الدىمەن شىعارمانىڭ ءون بويىنداعى ەمەس، استارىنداعى، كوزگە كورىنبەيتىن قۇپيا- سىرلارىن ىزدەيدى، جۇمباقتارىن شەشۋگە، جاۋابىن تابۋعا تىرىسادى.
جازۋشى وسى ءۇش ءتۇرلى وقىرماننىڭ دا ۇدەسىنەن شىعا بىلسە، ماقساتىنىڭ ورىندالعانى! ول ءبىرىنشى وقىرماندى قىزىقتىرىپ، باۋراپ الاتىنداي، ياعني شىعارمانى وقي باستاعاننان- اق تارتىپ اكەتەتىندەي ەتىپ جازۋ كەرەك، ەكىنشىنىڭ دە، ءتىپتى ءۇشىنشى وقىرماننىڭ دا تالاپ- تىلەگىن ەسكەرۋى كەرەك!
ەگەر كەز كەلگەن شىعارمانى ءبىرىنشى وقىرمان تاستاي سالسا، مەن ول تۋىندىنى ەشقاشان ماقتاي المايمىن.. . فيلوسوفيا سوعىپ، ادام تۇسىنبەستەي كۇردەلى جازۋ دەگەندى دە تۇسىنبەيمىن. «مەنى تۇسىنبەيدى!» دەپ كەۋدەسىن سوعاتىن كەيبىر جازعىشتارمەن دە كەلىسە المايمىن. كەز كەلگەن كوركەم شىعارما قاراپايىم، ۇعىنىقتى تىلمەن جازىلۋى كەرەك! مىقتى بولساڭ، شىعارمانىڭ ءون بويىندا ەمەس، ايتار ويىڭدى استارىندا ايت، فيلوسوفياڭدى سىرتىندا قالدىر، جۇمباعىڭدى شەشۋ ءۇشىن تەرەڭىنە تارت، تۇبىنە بويلات.. . كەرەك ادام تەڭىزدىڭ تۇبىندەگى اسىل قازىنانى دا تاۋىپ الادى. سوندىقتان شىعارماسى وقىلماسا، جازۋشى وقىرماندى ەمەس، ءوزىن كىنالاۋ كەرەك!
تالانتتى ءتىرى كەزىندە باعالاعانعا نە جەتسىن! ءبىراق بۇل مىندەتتى ەمەس. ول شىنىمەن تالانتتى بولسا، ەرتە مە، كەش پە، ءتۇبى ءبىر باعالانادى. ءوز باعاسىن مىندەتتى تۇردە الادى. ال مۇلدە باعالانباسا، ونىڭ جازعاندارى اسا باعالى ەمەس دەپ ويلاڭىزدار.
وقىرمان قاشان دا ادىلەتتى، ولارمەن ساناسپاۋعا، كەلىسپەۋگە بولمايدى. ال سىنشىنىڭ دا ءادىل بولعانى دۇرىس، اعىن اق، قاراسىن قارا دەپ كورسەتسە، كانەكي! ءبىراق سىنشىنىڭ نەگىزگى مىندەتى - شىعارمانىڭ وقيعاسىن ايتىپ شىعۋ نەمەسە مازمۇنىن قايتالاۋ ەمەس (ونى وقىرماننىڭ ءوزى- اق ءبىلىپ الادى ەمەس پە؟ ) ، كوزگە كورىنبەيتىن قۇپيا- سىردى اشۋ، جالپاق جۇرتقا جايىپ سالۋ، شىعارمانىڭ جۇمباعىن شەشۋ، سانسىز ساۋالداردىڭ جاۋابىن ايتۋ.. .
جاريالانۋدىڭ ناعىز ءلاززاتى جاس كەزدە بولادى. العاشقى شىعارمالارىڭ تاسقا باسىلعان كەزدە قۋانىشىڭ قوينىڭا سىيماي، بوركىڭدى اسپانعا اتىپ، ءبىر- اق كۇندە اتاقتى بولىپ شىعا كەلگەندەي كۇي كەشەسىڭ! ال جاسىڭ ۇلعايعان سايىن ول سەزىمدەر دە باسىلا باستايدى. ارينە، قازىر دە جاڭا كىتابىڭ جارىق كورگەن سايىن ءبىر جەلپىنىپ قالاتىنىڭ راس. ءبىراق ءبارىبىر بالاڭ كەزدەگىدەي ارناسىنان اعىپ- توگىلگەن اقكوبىك سەزىمدەر قايدان بولسىن؟
ال حالىقتىڭ ىقىلاس- پەيىلىن سەزىنۋدىڭ ءوزى ءبىر عانيبەت ەمەس پە؟ ! شىعارماشىلىقتىڭ ناعىز راحاتى مەن ءلاززاتى وسى ما دەيمىن! ونى كۇندە سەزىنەمىن، وقىرماندار حابارلاسىپ، شىنايى سەزىمدەرىن ءبىلدىرىپ جاتادى!.. وقىرماندارىمنىڭ دا از ەمەس ەكەنىن ىشتەي سەزەمىن!
قۇدايعا مىڭ دا ءبىر شۇكىر، وسى ۋاقىتقا دەيىن بىردە- ءبىر سىنشىنىڭ سىن ساداعىنا ءىلىنىپ كورمەپپىن، كىلەڭ ماقتاۋ ءسوز ەستىپ كەلەمىن! سوندىقتان مەن حالىققا دا، وقىرمانعا دا، سىنشىعا دا وكپە ايتا المايمىن!
ەگەر ادام وزىنە- ءوزى سەنىمدى بولسا، ماقتالۋ مەن سىنالۋدىڭ ەشقانداي زيانى جوق! تەك ماقتالدىم دەپ داندايسىپ كەتپەسەڭ، سىنالدىم دەپ، ۇنجىرعاڭدى ءتۇسىرىپ الماساڭ بولعانى. ماقتاۋعا سەمىرىپ كەتپەي، ال سىننان قورتىندى شىعارا الساڭ، ۇپايىڭدى قاي كەزدە دە تۇگەندەپ الاسىڭ! ال سىنالماۋدىڭ جامان جاعىن ءوز باسىم، ءالى كورە قويعان جوقپىن! ءبىر سوزبەن ايتقاندا، ماقتالۋ تالانتىڭا تالانت قوسپايدى، ال سىنالۋ بارىڭدى تارتىپ الا المايدى. ءتىپتى، بۇعان باس قاتىرۋدىڭ دا قاجەتى شامالى.
