ەلىمىزدە سوتتالعانداردىڭ سانى جيىرما جىلدا ءۇش ەسە ازايدى

استانا. قازاقپارات - ەلىمىزدە سوتتالعانداردىڭ سانى توقسانىنشى جىلداردىڭ باسىنان بۇگىنگى كۇنگە دەيىن ءۇش ەسەگە ازايدى.

بۇل تۋرالى بۇگىن «كولونيالارداعى جۇمىسپەن قامتۋ-2017» اتتى تۇرمە رەفورماسىنىڭ ەكىنشى فورۋمى بارىسىندا ق ر مەملەكەتتىك حاتشىسى گۇلشارا ءابدىقالىقوۆا ءمالىم ەتتى، دەپ حابارلايدى BNews.kz ءتىلشىسى.

«سوتتالعانداردىڭ سانى بىرتىندەپ ازايىپ كەلەدى. ەگەر 90-جىلداردىڭ باسىندا تۇرمەلەردە 140 مىڭعا دەيىن ادام جازاسىن وتەسە، بيىلعى جىلى ولاردىڭ سانى 40 مىڭعا دەيىن قىسقاردى. باس بوستاندىعىنان ايىرۋمەن بايلانىستى ەمەس، بالامالى جازانىڭ ۇلەسى ارتىپ كەلەدى»، - دەيدى گ. ءابدىقالىقوۆا.

مەملەكەتتىك حاتشى كەيىنگى جىلدارى رەسپۋبليكامىزدا قىلمىستىق زاڭداردى ىزگىلەندىرۋ ىسىندە ەلەۋلى جۇمىستار اتقارىلعانىنا توقتالدى.

«بۇگىنگى تاڭدا تۇزەۋ مەكەمەلەرىندە جازاسىن وتەۋشىلەردىڭ قۇقىقتارى مەن زاڭدى مۇددەلەرىن قورعاۋ جانە سوتتالعانداردى ۇستاۋ جاعدايىن حالىقارالىق ستاندارتتارعا سايكەستەندىرۋ باعىتىندا ناقتى ءىس-شارالار جۇرگىزىلىپ جاتىر. قازىر 2018 - جىلعا دەيىن سوتتالعانداردى جۇمىسپەن قامتۋدى 75 پايىزعا جەتكىزۋ مىندەتى قويىلىپ وتىر»، - دەيدى مەملەكەتتىك حاتشى.

ايىمگۇل ابىلەۆا