قازاق رۋحاني- مادەني مۇراسى جيناقتالعان «ەلەكتروندى قازاق ۇيىنە» تاڭدامالى ايتىس جىرلارى ەنەدى
بۇل تۋرالى بۇگىن الماتىدا وتكەن «ۇلتتىق قۇندىلىقتار - الەم نازارىندا» اتتى كونفەرەنتسيا بارىسىندا جوبانىڭ اۆتورى، جۋرناليست جارقىن سالەن ۇلى مالىمدەدى.
اتالعان مۋزىكالىق- ينتەراكتيۆتى قۇرال 2013 - جىلدىڭ ءساۋىر ايىندا تۇتىنۋشىعا جول تارتقان بولاتىن.
بەسىك جىرلارى، ەرتەگىلەر، بالالار اندەرى، حالىق كومپوزيتورلارىنىڭ ءان- كۇيلەرى، تەرمە- تولعاۋلار، وتانشىلدىق رۋحتاعى اندەر، ابايدىڭ قارا سوزدەرىن قامتىعان 1200 رۋحاني تۋىندىنى ءون بويىنا سىيعىزعان باعالى مۇرا 2015 - جىلى ءبىرشاما جەتىلدىرىلىپ، جاڭا مازمۇنمەن تولىقپاق.
«بۇل جوبا وسى جەتىستىگىمەن توقتاپ قالمايدى. بيىل العاشقى ءونىمى شىقتى. ارينە، كەمشىلىكتەر بولسا تۇزەلىپ، ۇسىنىستار بولسا ەسكەرە جاتامىز. قۇداي قالاسا كەلەسى جىلى تاڭداۋلى ايتىس جىرلارىمەن تولىقتىرامىز. جوباعا ەنبەي قالعان تالاي جاۋھارلارىمىز بار. كەلەر جىلى قۇرمانعازى اتىنداعى كونسەرۆاتوريانىڭ وقىتۋشىلارىمەن كەلىسە وتىرىپ قۇرالدىڭ مازمۇنىن ودان ءارى جەتىلدىرە تۇسەمىز»، - دەدى جارقىن سالەن ۇلى.
جوبا اۆتورلارى «ەلەكتروندى قازاق ءۇيدى» الەمدىك دەڭگەيگە شىعارۋ ءۇشىن شەتەلدىك قازاقتارعا تانىستىرىپ قايتقان.
«موڭعوليا، رەسەي، تۇركيادا تانىستىرىلىمىن جاسادىم. تۇركيالىق ازاماتتار تاراپىنان الداعى ۋاقىتتا بۇعان بۇكىل تۇركى جۇرتىنىڭ مۋزىكالىق مۇراسىن ەنگىزسەك دەگەن ۇسىنىس ايتتى. شەتەلدەگى قانداستارىمىز بۇكىل قازاقستان كوشىپ كەلگەندەي بولدى دەپ قۋانىپ جاتىر. سونداي- اق، بۇل قۇرال ج و و مەن ورتا وقۋ ورىندارىندا مۋزىكالىق- پەداگوگيكالىق كومەكشى قۇرال رەتىندە پايدالانىلا باستادى. ۇشىنشىدەن، بۇل ءبىزدىڭ ۇرپاققا قاجەت دۇنيە. باۋىرجان اتامىز ايتقانداي، بۇل ەرتەگى ايتپايتىن اجەلەردىڭ، بەسىك جىرىن ايتپايتىن كەلىندەردىڭ ورنىن باساتىن دۇنيە»، - دەدى ج. سالەن ۇلى.
ايتا كەتەيىك، «ۇلاس- ەلەكتروندى» ج ش س ءونىمى - جوبا جەتەكشىلەرىنىڭ 3 جىلدىق قاجىرلى ەڭبەگىنىڭ جەمىسى.
شاعىن عانا كيىز ءۇيدىڭ ماتەريالدارى بۇلدىرشىندەرگە قاۋىپسىز ەتىپ جاسالىنعان. كيىز ءۇيدىڭ تەتىكتەرىن باسساڭىز، قازاقتىڭ كۇيى كۇمبىرلەپ، ءانى شىرقالا باستايدى. ءتىپتى بالالارعا ارنالعان ەرتەگىلەر، اڭىز- اڭگىمەلەر، ابايدىڭ قارا سوزدەرىنە دەيىن بار. قازاق حالقىنىڭ اۋىز ادەبيەتى ءىنجۋ- مارجان مۇراسىنىڭ قۇندى جاۋھارلارىن دا وسى ەلەكتروندى قازاق ۇيدەن تاباسىز. ءونىمنىڭ قۇنى - 10 مىڭ تەڭگە.
اتالعان جوبا ءۇشىن اۆتورلار ق ر ءبىلىم جانە عىلىم مينيسترلىگىنىڭ العىس حاتىنا لايىق دەپ تانىلدى.
ەندى ەلەكتروندى قازاق ءۇيىن مەكتەپ پەن بالاباقشا باعدارلاماسىنا قازاق ءتىلى مەن تاريحىن وقىتۋ قۇرالى رەتىندە ەنگىزۋ كوزدەلىپ وتىر. 2015 - جىلى اتالعان ماسەلە ق ر ب ع م ساراپتاۋ كەڭەسىندە تالقىلاناتىن بولدى.
اۆتور: گۇلميرا عوسمانالي
