تاعى ءبىر قايىرشى باقىتىن تاپتى

استانا. قازاقپارات - قاڭعىباستىڭ دا باسىنا باق قوندى.

الماتىدا 2  جىل قاتارىنان قايىر تىلەۋمەن كۇن كورگەن ۆلاديمير ۋستالوۆ ktk ارناسىنىڭ ارقاسىندا مول باقىتقا كەنەلدى.

ەلۋ ءۇش جاستاعى اۋعان سوعىسىنىڭ مۇگەدەگى كوشە بويىندا تۇرىپ اسكەري اندەردى ورىنداۋمەن كۇنەلتكەن ەدى.

الايدا اككوردەون تارتقان ارداگەرگە ءتارتىپ ساقشىلارى تالاي مارتە كۇن كورسەتپەي، اراعا ءتىپتى تىلشىلەردىڭ ارالاسۋىنا تۋرا كەلگەن.

ەندى ۆلاديميردى ەشكىم دە «قايىرشى» دەپ اتامايدى. ەر ازاماتتىڭ ءوڭى كىرىپ، سۇيەگىنە ەت بىتكەن. الماتىنىڭ قاق ورتاسىندا ءۇش بولمەلى پاتەرى، ءتىپتى سۇيىكتى كەلىنشەگى دە بار.

تۋرا وسىدان ءبىر جىل بۇرىن ول وزگە مۇقتاج جاندارمەن بىرگە كوشە بويىندا تۇرىپ قايىر تىلەگەن بولاتىن.

الاقان جايىپ ەمەس، اۋعان سوعىسىنىڭ ارداگەرى اككوردەوندا كىلەڭ اسكەري اندەردى ورىندايتىن. نەبارى 10 مىڭ تەڭگە عانا زەينەتاقى الاتىن ول باۋىرلارى ۇيىنەن قۋىپ شىققان سوڭ قايىر تىلەۋگە ءماجبۇر بولعان.

الايدا ودان كوشە بويىن دا قىزعانعاندار تابىلدى. ءتارتىپ ساقشىلارى ءان ايتىپ نانىن تاۋىپ جۇرگەن ونىڭ ىزىنە ءتۇسىپ، جان-جاقتاپ قۋدالاپ بىتكەن.

اۋعان ارداگەرى ەندى كوشەدە تۇرمايدى. اسكەري كومۋفلياجىنان باسقا ۇستىندە ءىلىپ الار كيىمى دە بولماعان ازاماتتى ktk ارناسىنان كورىپ، ءىرى كومپانيا وكىلدەرى بىردەن جۇمىس ۇسىنىپتى.

«شىنىمدى ايتسام، ءومىرىم وزگەرەدى دەپ مىڭ ۇيىقتاسام دا تۇسىمە كىرمەپتى. قازىر باسىمدا باسپانام، تۇراقتى جۇمىسىم، كولىگىم دە بار. ءبارى ءبىر ساتتە وزگەردى. مەنەن اسقان باقىتتى جان جوق»، - دەيدى اۋعان سوعىسىنىڭ ارداگەرى ۆلاديمير ۋستالوۆ.

قازىر ۆلاديميردىڭ كولىگى دە بار. قارتايعان شاعىندا قايىر تىلەۋگە ءماجبۇر بولعان سوعىس ارداگەرى بۇرىنعى كوشەدەگى ءومىرىن قورقىنىشتى تۇستەي ۇمىتقان. ال قولىنا الىپ، قايىر تىلەگەن اسپابىمەن ول قازىر ءوزىنىڭ جەكە حورىن قۇرىپ، ءتىپتى قازاق تىلىندە ءان شىرقاپ ءجۇر.

«وزگەدەن دە ەڭ سۇلۋ،

ومىرلىك دوس تەڭ سۇلۋ.

ءوزىم ءسۇيىپ ۇناتقان،

بارىنەن دە سەن سۇلۋ، سەن سۇلۋ...» ، - دەپ شىرقادى ول.

BNews.kz