قازاقستان بالا تۋۋ كورسەتكىشى بويىنشا رەكورد ورناتۋدا
دەپ جازادى «ەكسپرەسس- ك» باسىلىمى.
سوڭعى رەت بالا تۋۋ بويىنشا مۇنداي كورسەتكىش شيرەك عاسىر بۇرىن تىركەلگەن ەكەن. جالپى، ەلىمىزدىڭ حالىق سانى جوسپارلانعاننان الدەقايدا تەزىرەك ءوسىپ جاتىر. 90- جىلدارداعى دەموگرافيالىق ەسەپتەۋلەرگە سەنسەك، قازاقستان تۇرعىندارىنىڭ سانى 2030 - جىلعا قاراي 20 ميلليونعا جەتۋى كەرەك بولاتىن. الايدا، بۇگىنگى كۇننىڭ وزىندە رەسپۋبليكامىزدا تۇراتىن ازاماتتاردىڭ سانى 17 ميلليوننان اسىپ جىعىلادى.
دەنساۋلىق ساقتاۋ جانە الەۋمەتتىك دامۋ مينيسترلىگىنىڭ مالىمەتتەرىنە سايكەس، كۇن سايىن ەلىمىزدە مىڭنان اسا نارەستە دۇنيە ەسىگىن اشادى. سالىستىرمالى تۇردە الاتىن بولساق، ءبىر عانا استانا قالاسىنىڭ وزىندە تۇڭعىش پرەزيدەنت كۇنى مەرەكەسىندە 60 ءسابي دۇنيەگە كەلىپتى. بۇل بىلتىرعى جىلدىڭ كورسەتكىشىمەن سالىستىرعاندا 10 بالاعا ارتىق.
قازاقستاندىقتاردىڭ بالا سۇيۋگە دەگەن قۇلشىنىسىنىڭ استارىندا ەلىمىزدە ورناعان ساياسي- ەكونوميكالىق تۇراقتىلىق جاتىر دەيدى دەموگرافتار.
