حالىقارالىق اۋىر اتلەتيكا فەدەراتسياسىنىڭ پرەزيدەنتى ەلباسىنا الماتىدا اۋىر اتلەتيكادان ءا چ تابىستى وتۋىنە بايلانىستى العىس ءبىلدىردى
بۇل تۋرالى اقوردانىڭ باسپا ءسوز قىزمەتى حابارلادى.
اۆتور ءوزىنىڭ حاتىندا الماتىدا وتكەن چەمپيونات وسى جارىس ءتۇرىنىڭ تاريحىنداعى ەڭ تابىستى تۋرنير بولعانىن اتاپ وتكەن.
سوعان وراي ول مەملەكەت باسشىسىنا، ۇكىمەت مۇشەلەرىنە جانە سپورت قايراتكەرلەرىنە اتالعان جارىستى لايىقتى دەڭگەيدە ۇيىمداستىرۋعا ايرىقشا كوڭىل بولىنگەنى ءۇشىن ريزاشىلىعىن بىلدىرەدى.
IWF پرەزيدەنتى سونداي- اق قازاقستان اتلەتتەرى جوعارى ناتيجەلەرگە قول جەتكىزگەنىن ايتا وتىرىپ، جالپى بۇل تۋرنير ناتيجەلەرى بۇكىل الەمدە زور رەزونانس تۋدىرعانىنا توقتالادى.
سونىمەن قاتار حاتتا الماتىدا حالىقارالىق اۋىر اتلەتيكا فەدەراتسياسىنىڭ جىل سايىنعى كونگرەسى وتكەنى، ونىڭ بارىسىندا فەدەراتسيانىڭ 109 جىلدىق تاريحىندا ماڭىزدى مانگە يە بولعان شەشىمدەر قابىلدانعانى ايتىلادى.
سوڭىندا ت. ايان اۋىر اتلەتيكادان الەم چەمپيوناتى 2022 - جىلعى قىسقى وليمپيادا ويىندارىن وتكىزۋ ءۇشىن الماتىنىڭ كانديداتۋراسىن ىلگەرىلەتۋگە سەپتىگىن تيگىزگەنىنە نازار اۋدارعان.
