قىزىلوردادا ەڭ ۇزدىك قازاق ءتىلدى مەكەمە ماراپاتتالدى

قىزىلوردا. قازاقپارات- تاۋەلسىزدىك مەرەكەسىنە وراي قىزىلوردا وبلىسىنىڭ تىلدەردى دامىتۋ باسقارماسىنىڭ ۇيىمداستىرۋىمەن «تاۋەلسىزدىك جانە ءتىل» تاقىرىبىندا دوڭگەلەك ۇستەل وتىرىسى ءوتتى.

 دوڭگەلەك ۇستەلگە «نۇر وتان» پارتياسى» قوعامدىق بىرلەستىگى وبلىستىق فيليالى ءتوراعاسىنىڭ ءبىرىنشى ورىنباسارى ءو. بولاتبەكوۆ، وبلىستىق، اۋماقتىق باسقارمالار، دەپارتامەنتتەر مەن ينسپەكتسيالار باسشىلارى، تىلگە جاۋاپتى ماماندارى، باسقارما جانە تىلدەردى وقىتۋدىڭ وڭىرلىك ورتالىعىنىڭ قىزمەتكەرلەرى، ب ا ق وكىلدەرى قاتىستى، - دەپ حابارلادى باسقارمانىڭ باسپا ءسوز قىزمەتىنەن.

 دوڭگەلەك ۇستەلدىڭ كۇن تارتىبىنە سايكەس، «نۇرلى جول- بولاشاققا باستار جول» اتتى ەلباسىنىڭ 11 - قاراشادا قازاقستان حالقىنا ارناعان جولداۋى جانە مەملەكەت باسشىسىنىڭ بۇدان بۇرىنعى جولداۋلارىندا ناقتىلانعان ءتىل تۋرالى باسىمدىقتارى جايىندا «نۇر وتان» پارتياسى» قوعامدىق بىرلەستىگى  قىزىلوردا وبلىستىق فيليالى ءتوراعاسىنىڭ ءبىرىنشى ورىنباسارى ءو. بولاتبەكوۆ، «تاۋەلسىزدىك جانە ءتىل» تاقىرىبىندا وبلىستىق تىلدەردى دامىتۋ باسقارماسىنىڭ ءبولىم باسشىسى ل. ەسىموۆا،  قىزىلوردا وبلىسى بويىنشا قىلمىستىق- اتقارۋ جۇيەسى دەپارتامەنتىنىڭ باسشىسى ع. وتاربايەۆتىڭ قىلمىستىق اتقارۋ- جۇيەسى مەكەمەسىندە مەملەكەتتىك ءتىلدىڭ قولدانىس اياسىن كەڭەيتۋ، ءتىل ساياساتىنىڭ جۇزەگە اسۋى باعىتىندا اتقارىلعان جۇمىستار جونىندەگى باياندامالارى تىڭدالدى.

شارا سوڭىندا باسقارما باسشىسى ءا. جارىلقاعانوۆ تاۋەلسىزدىك كۇنىنە وراي وتكىزىلگەن «ەڭ ۇزدىك قازاق ءتىلدى مەكەمە» وبلىستىق بايقاۋىنىڭ جەڭىمپازدارىن جاريالاپ، ءبىرقاتار مەكەمەلەردىڭ تىلگە جاۋاپتى ماماندارىن ماراپاتتادى.

بايقاۋ قورىتىندىسى بويىنشا ءبىرىنشى ورىندى قىزىلوردا وبلىسى بويىنشا قىلمىستىق- اتقارۋ جۇيەسى دەپارتامەنتى جەڭىپ السا، ەكىنشى ورىنعا قىزىلوردا وبلىسىنىڭ جولاۋشىلار كولىگى جانە اۆتوموبيل جولدارى باسقارماسى، ءۇشىنشى ورىنعا قىزىلوردا وبلىسىنىڭ ءبىلىم سالاسىنداعى باقىلاۋ دەپارتامەنتى يە بولدى.

سونىمەن قاتار، تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىنىڭ قىزىلوردا وبلىسى بويىنشا دەپارتامەنتى، وبلىستىق كاسىپكەرلىك جانە تۋريزم باسقارماسى مەن وبلىستىق جاستار ساياساتى ماسەلەلەرى باسقارماسى ىنتالاندىرۋ سىيلىقتارىن يەلەندى. جەڭىمپازدارعا ارنايى ديپلومدار مەن باعالى سىيلىقتار تابىستالدى.

 وعان قوسا، ءبىرقاتار ازاماتتار وبلىس اكىمىنىڭ العىس حاتىمەن، «نۇر وتان» پارتياسى» وبلىستىق فيليالىنىڭ قۇتتىقتاۋ حاتىمەن جانە باسقارمانىڭ العىس حاتتارىمەن ماراپاتتالدى.

 اۆتور: ەلۋباي اۋەزوۆ