الماتىدا «ارعىماق» جۋرنالىنىڭ تۇساۋكەسەرى ءوتتى - فوتو
وسىعان دەيىن 3 مىڭ تارالىممەن بىرنەشە ءنومىرى قالىڭ وقىرمانعا جەتىپ ۇلگەردى. باسىلىمنىڭ شىعارۋشى رەداكتورى باعدات مۇحتار ۇلى وقىرمان تاراپىنان سۇرانىستى ەسكەرە وتىرىپ، كەلەر جىلى تارالىم سانىن 5 مىڭعا دەيىن ارتتىرۋ كوزدەلىپ وتىرعانىن ايتتى.
«ءبىزدىڭ جاڭا باسىلىمدى شىعارۋداعى نەگىزگى ماقساتىمىز - جىلقى شارۋاشىلىعىن دارىپتەۋ، قاراۋسىز قالعان قازاق جىلقىسىنىڭ تاعدىرىنا الاڭداۋ، قازاق جىلقىسىنىڭ جىرىن جىرلاۋ، ۇلتتىق ات سپورتىنىڭ تۇگەلىن تۇگەندەۋ. بۇگىندە جىلقىعا جاقىن حالىقپىز دەپ ايتامىز. جىلقىنى العاش قولعا ۇيرەتكەن قازاق قازىر الەمدە جىلقى جونىندە ەڭ سوڭعى ورىندامىز. وسى ءبىزدىڭ قابىرعامىزعا باتتى. نەگە وسىنداي كۇيگە تۇستىك؟ جىلقى شارۋاشىلىعىن دامىتۋدا زاماناۋي جۇيەلى جۇمىس بولمادى. الەمدە ۇلتتىق برەندكە اينالىپ جاتقان جىلقى يندۋسترياسى، تۋريزمى، تەراپياسى دەگەن ۇعىمدار بار. جىلقىنىڭ ارقاسىندا تابىس تاۋىپ وتىرعان ەلدەر بار. ءبىز وسى ەلدەرگە جەتۋ ءۇشىن قانداي جۇمىس جاساۋىمىز كەرەك؟ وسى ماسەلەنى كوتەرە وتىرىپ، حالىق پەن بيلىكتىڭ اراسىنداعى التىن كوپىر بولساق دەگەن نيەتپەن جۋرنالدى اشىپ وتىرمىز. التايدان اتىراۋعا، ارقادان الاتاۋعا دەيىنگى ارالىقتا اتبەگىلىكپەن اينالىسىپ جاتقان كونەكوز قاريالارىمىز بار. سولاردىڭ ويىن، تاجىريبەسىن جەتكىزسەك دەيمىز. قازىر وقىرماندار تاراپىنان جاقسى سۇرانىس بار. كەلەر جىلى تارالىمدى 5 مىڭعا جەتكىزسەك دەگەن ويىمىز بار» ، - دەدى باعدات مۇحتار ۇلى.
ونىڭ ايتۋىنشا، قازىر اتالعان تاقىرىپتا وزەكتى ماسەلەلەر وتە كوپ. ايتالىق، قازاق جىلقىسىنىڭ الىسقا شاباتىن جۇيرىك تۇقىمىن شىعارۋ، ات سپورتىن دامىتۋدىڭ الەمدىك ستاندارتتارىنىڭ ءبىرى يپپودروم سالۋ، شابارمانداردى وقىتۋ جۇيەسىن قالىپتاستىرۋ، جىلقى ءونىمى: قازى مەن قىمىزدى پاتەنتتەۋ سياقتى تۇتاس يندۋستريانى قالىپتاستىرۋ ۇلكەن عىلىمي زەرتتەۋدى تالاپ ەتەدى.
قازىر باسىلىمنىڭ شىعارماشىلىق ۇجىمى اتالعان سالادا تەر توگىپ كەلە جاتقان عالىمدارمەن تىعىز بايلانىستا جۇمىس جاساپ جاتىر.
قازاق راديوسىنىڭ بەلدى جۋرناليسى باقىت جاعىپار ۇلى قاپتاعان ارزانقول جۋرنالداردىڭ ىشىندە ايتارى سالماقتى «ارعىماق» جۋرنالىنىڭ قاتارعا قوسىلعانى ۇلكەن قۋانىش ەكەندىگىن جەتكىزدى.
يگى شارا قازاق ءداستۇرلى ءان ونەرىنىڭ وكىلدەرى ارداق يساتاي، ايگۇل قوسانوۆا، رامازان ستامعازى، كۇيشى مۇرات ءابۋعازىنىڭ قۇتتىقتاۋىمەن جالعاستى.
