ايتىسكەر اينۇر مەن سارا ايتقان ءسوز
كەشە عانا استانادا وتكەن «التىن دومبىرا» ايتىسىندا سارا ماقسات اقانمەن ايتىستى. ماقسات سارانىڭ استاناعا كەلۋىن ءسوز ەتتى. سارا جاۋاپتى ءدوپ قايتاردى:
استاناعا كوشتىڭ دەپ،
نەسىنە مەنى سىنادىڭ؟
اتا-ەنەڭدى ساراجان،
شاقىرماپسىڭ دەپ قويادى،
سوزدەرى قىزىق مىنانىڭ.
كەلىپ جاتسام ارقاعا،
كىرگەنىم ۇلكەن ورتاعا،
اعىزىپ جىردىڭ بۇلاعىن.
استاناعا كەلۋىم،
كۇيەۋىمنىڭ قالاۋى،
شەشىلدى مە ەندى سۇراعىن؟
كوشىپ بارامىن مەن سوندا،
قاي تاۋعا سالسا ۇياسىن،
سەنىپ وتىرعان قىرانىم.
كۇيەۋىم ءۇيدىڭ ەگەسى،
مەن ونىڭ قاققان شەگەسى.
سونىڭ ارتىنان ەرەمىن،
سونىڭ ايتقانىن قىلامىن.
بەتپاققا كوشەم دەسە دە،
بەتپاققا بارىپ تۇرامىن.
جامان كەلىن دەپ ءسوز قىلماي،
اتا-ەنەمدى جازعىرماي،
وتباسىندا بىرەۋدىڭ،
شارۋاڭ بولماسىڭ شىراعىم، - دەپ زال تولى كورەرمەننىڭ ىقىلاسىن وزىنە اۋدارىپ الدى. بايقاپ وتىرمىز. سارانىڭ «بەتپاققا كوشەم دەسە دە،
بەتپاققا بارىپ تۇرامىن» دەپ وتاعاسىنىڭ شەشىمىنە شاكسىز بويسۇناتىنىن ايتقاندا اعايىننىڭ ريزاشىلىعى ەرەكشە بولدى.
تاعى وسى ايتىستا تارازدان كەلگەن جاس اقىن اسەت دۇيسەباي اينۇرعا:
بىرەۋگە اسپانداعى اي-جۇلدىزسىڭ،
بىرەۋگە قول جەتپەيتىن ادەمىسىڭ.
جۇرتقا سونشا كەرەمەت بولساڭداعى،
ال مەن ءۇشىن اعامنىڭ ايەلىسىڭ، - دەپ ەدى. اينۇر جاس جىگىتتىڭ قاقپانىن باسپادى، سول باياعى تانىمىنان تانعان جوق:
بار بولعانى اعاڭنىڭ،
ايەلى بولسام سەن ءۇشىن،
ءدال سوعان بولا تارىلىپ،
تالمايدى مەنىڭ ءورىسىم.
ازاماتىمنىڭ ارقاسى،
بار جەتكەن بايگە جەمىسىم.
بىرەۋگە قۇندىز بولسام دا،
بىرەۋگە جۇلدىز بولسام دا،
اعاڭنىڭ جارى بولعاننان،
ارتىق اتاق جوق مەن ءۇشىن، - دەپ ىعىنا جىعىلا جاۋاپ بەرىپ ەلدىڭ دە، قازىلاردىڭ دا ىقىلاسىنا بولەندى. قىسقاسى، ەر قادىرىن ەل قادىرى دەپ بىلگەن قازاق ايەلدەرىنىڭ عاجايىپ بولمىسىن اقىن قىزدارىمىزدىڭ بويىنان تاۋىپ كەرەمەت اسەرگە بولەندىك. جانە ونى ونەگەلى جىرمەن ورنەكتەپ تۇرىپ ەلگە ۇسىنسا ونەردىڭ ۇلتقا قىلعان قىزمەتى ەمەس پە؟ امان بولىڭىزدار الاشتىڭ ارداقتى اقىن قىزدارى!
رۇستەم نۇركەن
kazaitys.kz
