قازاق قىزىنا يۋنەسكونىڭ شەشىمىمەن «الەم ءارتىسى» قۇرمەتتى اتاعى بەرىلدى
مۋزىكا سالاسىنداعى جوعارى جەتىستىكتەرى ءۇشىن وعان قازاقستان رەسپۋبليكاسىنىڭ حالىق ءارتىسى، حالىقارالىق شىعارماشىلىق اكادەمياسىنىڭ اكادەميگى اتاعى، يۋنەسكو-نىڭ شەشىمىمەن «الەم ءارتىسى» قۇرمەتتى اتاعى بەرىلدى.
2000 - جىلى مەملەكەتتىك سىيلىققا يە بولدى. قازاقستان مەسەناتتار كلۋبى «پلاتيندى تارلان» سىيلىعىمەن ماراپاتتادى. ەسىمى «XX عاسىردىڭ 2000 كورنەكتى مۋزىكانتى» اتتى دۇنيەجۇزىلىك قۇرمەتتى تىزىمگە ەنگىزىلدى.
شىعىس اۋەنىنىڭ نازىكتىگىن، سەزىمتالدىعىن ەۋروپانىڭ مۋزىكالىق مادەنيەتىنىڭ كوپقىرلىعىمەن ۇندەستىرىپ، ۇلتتىق ونەردى الەم حالقىنا تانىتقان ايمان مۇساقوجايەۆانىڭ ءان-اۋەزگە دەگەن اۋەستىگى بالا كەزىنەن باستالدى.
مۇساقوجايەۆتار وتباسىندا ءتورت قىز بالا تاربيەلەنىپ، بارلىعى مۋزىكا جولىن تاڭدايدى. ءبىرى ايمان سەكىلدى سكريپكادا، ەكىنشىسى - قىلقوبىزدا، تاعى ءبىر ءسىڭىلىسى ۆيولونچەلدە وينايدى. ايماننىڭ اۋەل باستان سكريپكانى مەڭگەرۋىنىڭ وزىندىك سىرى بار.
ايمان مۇساقوجايەۆا، ق ر ەڭبەك سىڭىرگەن ءارتىسى:
- مەن سكريپكانى تاڭدامادىم، ول مەنى تاڭدادى. نينا ميحايلوۆنا پاترۋشيەۆا كوميسسيادا وتىرىپ، ءوزى تاڭداپ، اناما تاعى بالالارىڭىز بار ما دەپ سۇراعان ەدى. سول كەزدە انام دا ءتورت بالام بار، تورتەۋى دە قىز دەيدى. ۇستازىم تورتەۋىن دە اكەلىڭىز دەيدى اناما.
ول كەزدە ايمان بار بولعانى 4 جاستا ەدى. سودان بەرى سكريپكا - ونىڭ سەنىمدى سەرىگى.
7 جاسىنان باستاپ ايمان كونسەرتتەرگە قاتىسىپ، 13 جاسىندا كاميل سەن- سانستىڭ سكريپكاعا ارنالعان تۋىندىسىن ورىندايدى. تاڭەرتەڭ جالپى ءبىلىم بەرەتىن مەكتەپتە وقىپ شىعىپ، ءتۇس قايتا مۋزىكا سىنىبىنا جول تارتاتىن شاكىرتتىڭ بالا بولىپ ويناۋعا ۋاقىتى قالمايتىن. بەلگىلى ارميان كومپوزيتورى ارام حاچاتۋريان 7-سىنىپتا وقىپ جۇرگەن ايماننىڭ ورىنداۋ شەبەرلىگىن كورىپ، ونىڭ ۇلى سكريپكاشى بولاتىندىعىنا سول كەزدە-اق سەنگەن كورىنەدى.
كۇلاش بايسەيىتوۆا اتىنداعى رەسپۋبليكالىق مۋزىكا مەكتەبىن ءتامامداعان سوڭ، ماسكەۋدەگى پ. چايكوۆسكي اتىنداعى كونسەرۆاتوريادا ءبىلىمىن جالعاستىردى.
العاش رەت مۇساقوجايەۆا 1976 - جىلى يۋگوسلاۆيادا، بەلگراد قالاسىندا وتكەن حالىقارالىق بايقاۋدا لاۋرەات اتانعان ەدى. ودان كەيىن كوپتەگەن بايقاۋدىڭ جەڭىمپازى اتانىپ، قازاقتىڭ اتىن الەمگە تانىتتى. وسىلايشا اسىل ارماندارىنىڭ ءبىرىن اقيقاتقا اينالدىردى.
ايمان مۇساقوجايەۆا، ق ر ەڭبەك سىڭىرگەن ءارتىسى:
- مەنىڭ ارماندارىم كوپ، ءبىراق سولاردىڭ نەگىزگىسى ورىندالدى. قازاقتىڭ مۋزىكا اكادەمياسىن قۇرىپ، كەيىن قازاقتىڭ ونەر ۋنيۆەرسيتەتىن قۇردىق. ءبىزدىڭ بولاشاعىمىز جاستاردا. بولاشاقتا جاستارىمىز وزدەرىنىڭ ونەرىن كورسەتىپ، قازاقستاننىڭ تۋىن، مادەنيەتىمىزدىڭ تۋىن جوعارى كوتەرەدى دەگەن سەنىمدەمىن.
ايمان مۇساقوجايەۆا سوڭعى 15 جىلدا قولىنداعى سكريپكانىڭ سۇيەمەلدەۋىمەن عانا ونەر كورسەتەدى. بۇل - انتوني ستراديۆاريدىڭ 1732 - جىلى جاساعان ءمىنسىز تۋىندىلارىنىڭ ءبىرى. ونىڭ باعاسى 800 مىڭ دوللار تۇرادى.
ايمان مۇساقوجايەۆا، ق ر ەڭبەك سىڭىرگەن ءارتىسى:
- بۇرىن ارەنداسى 100-200 دوللار تۇرعان. قازىر ديەۆولۆاتسياعا بايلانىستى ايىنا 500 دوللار تولەيمىن. ارەنداعا الىپ، سكريپكاممەن الەمنىڭ ءبارىن ارالادىم. سول سكريپكامەن كارنەگي حولدا دا، لينكولن ورتالىعىندا دا ويناعانمىن. لوندوندا، نيۋ-يوركتا دا بولدىم.
ايمان قوجابەك قىزى - الەمگە تانىمال سكريپكاشى عانا ەمەس، ول اسىل انا ءارى سۇيىكتى اجە. جۇمىسى قاۋىرت جان قاشاندا جاقىندارىنا ۋاقىت تاۋىپ، ولارعا قولداۋ كورسەتۋدەن جالىقپايدى. سكريپكانىڭ ءۇنى قينالعاندا وعان قۋات بەرىپ، شارشاعاندا شابىتتاندىرادى. چايكوۆسكيدىڭ «شابىت - جالقاۋلاردى قالاي بەرمەيتىن، سيرەك كورىنەتىن قوناق» دەگەن ءسوزى ايماننىڭ ومىرلىك ۇستانىمىنا اينالعان. تابيعاتىنان تاباندى، ەڭبەكقور جان بۇگىنگى جەتىستىگىمەن شەكتەلىپ قالماق ەمەس.
اۆتورلارى: گۇلمايرا قۋاتباي قىزى، عاني الشىنبايەۆ
24.kz
