قىتايدا لاڭكەستەرگە قاتىستى سوت شەشىمى شىقتى
ولاردىڭ 8 ى ءولىم جازاسىنا كەسىلدى، تاعى بەسەۋىنىڭ اتۋ جازاسى 2 جىلعا شەگەرىلدى، تورتەۋى ءومىر بويى تۇرمەگە قامالدى. سوت ولاردى تەرروريستىك ۇيىم قۇردى، جارىلعىش زاتتار جاساپ، قوعامعا قاۋىپ ءتوندىردى دەپ تانىدى.
بۇل شىنجاڭ ۇيعىر اۆتونومدى اۋداننىڭ اكىمشىلىك ورتالىعىندا جارىلىس ۇيىمداستىردى دەپ ايىپتالعان كۇدىكتىلەر. ەستەرىڭىزگە سالايىق، بيىل ءساۋىردىڭ 30 ى ۇرىمجىدەگى تەمىرجول بەكەتىندە بولعان جارىلىستان 3 ادام كوز جۇمىپ، 79 ادام جارالاندى.
وسى قىلمىسقا قاتىسى بار ەكەۋى ءولىم جازاسىنا كەسىلدى، ۇشەۋىنىڭ جازاسى ەكى جىلعا شەگەرىلدى. لاڭكەستىك ارەكەت جاساعان قىلمىسكەردىڭ ايەلى سەدەردينا ساۆۋتا وكىنىشتەن وزەگى ورتەنىپ، كۇيەۋىن ايىپتايدى.
سادەردينا ساۆۋتا، ايىپتالۋشىنىڭ ايەلى:
- ەگەر ونىڭ جاۋاپكەرشىلىگى جوعارى بولسا، بالالارىن تاربيەلەپ، ادامشا ءومىر سۇرەر ەدىك. سونىڭ كەسىرىنەن ماعان ەكى بالامدى تاستاۋعا تۋرا كەلدى. ءبىز ءبىر كەزدە باقىتتى وتباسى ەدىك، ەندى ەشتەڭەمىز دە قالمادى.
ال مامىر ايىندا ۇرىمجىدەگى بازارعا بەلگىسىز بىرەۋلەر ەكى اۆتوكولىكپەن باسا كوكتەپ كىرىپ، جارىلعىش زاتتى ىسكە قوسقان ەدى. وتىزعا جۋىق بەيبىت تۇرعىن قازا تاۋىپ، تاعى ونداعان ادام اۋىر جارالاندى. بۇل وقيعاعا قاتىسى بار كۇدىكتىلەر دە ۇستالىپ، جاۋاپقا تارتىلدى.
تۋرسۋن ەمەت، ايىپتالۋشى:
- جاس جىگىتتەر مەنىڭ قاتەلىگىمدى قايتالامايدى دەپ ۇمىتتەنەمىن. ومىرلەرىڭدى، وتباسىلارىڭدى قادىرلەڭدەر. دۇرىس ءومىر سۇرىڭدەر. قىلمىستى ادام جازاسىز قالمايدى.
جالپى قىتايداعى ءساۋىر جانە مامىر ايىنداعى ەكى لاڭكەستىك وقيعادان بارلىعى 40 ادام قايتىس بولىپ، 170 ى جارالانعان.
اۆتورلارى: نۇربەك بەكەن، جاڭ ءسۇي
24.kz
