سپورت جۇلدىزدارى قاراعاندىعا جينالعالى جاتىر
بەس كۇنگە سوزىلاتىن جارىستى تاماشالاۋ ءۇشىن ا ق ش-تىڭ اتاعى جەر جارعان كاسىپقوي بوكسشىسى، كوپتەگەن بەلدى نۇسقالار بويىنشا الەمنىڭ بىرنەشە دۇركىن چەمپيونى روي دجونستىڭ الاش توپىراعىنا ات باسىن ارنايى بۇرعالى جاتقانى جايىندا ءبىز بۇعان دەيىن دە حابارلاعانبىز.
كۇنى كەشە تۋرنيردى ۇيىمداستىرۋشىلار جانكۇيەرلەردى تاعى بىرنەشە جاعىمدى جاڭالىقپەن قۋانتتى. ولاردىڭ ايتۋىنشا، جارىلعاپوۆتى ەسكە تۇسىرۋگە ارنالعان جارىستى كورۋگە باسقا دا سپورت جۇلدىزدارى ەرەكشە قۇلشىنىس بىلدىرگەنگە ۇقسايدى. سولاردىڭ اراسىندا سەرگەي كوتەنكو (سۋ دوبى)، ۆلاديمير سميرنوۆ (شاڭعى)، ولەگ ماسكايەۆ (كاسىپقوي بوكس)، ولگا شيشيگينا (جەڭىل اتلەتيكا)، دميتري كارپوۆ (ونسايىس)، يليا يلين (اۋىر اتلەتيكا) جانە يۋريي مەلنيچەنكو (گرەك-ريم كۇرەسى) سىندى ساڭلاقتار بار. ال وليمپيادا ويىندارىنىڭ جەڭىمپازدارى ەرماحان ىبرايىموۆ پەن سەرىك ساپيەۆ باستاعان بوكسشىلار قاۋىمى قاراعاندىداعى تۋرنيرگە جىل سايىن كەلىپ تۇرادى.
اتالمىش جارىس وتكەن عاسىردىڭ سەكسەنىنشى جىلدارىنىڭ بەل ورتاسىنان باستاپ ۇيىمداستىرىلىپ كەلەدى. بۇگىنگى تاڭدا مەملەكەتىمىزدىڭ ماقتانىشىنا اينالىپ وتىرعان كوپتەگەن بوكسشىلار وسى تۋرنيردە تالاي مارتە توپ جارعان. كەزىندە كۋبا قابىلاندارى دا قاراعاندىدا كۇش سىناستى. بيىلعى جارىسقا دا رەسپۋبليكامىزدىڭ بارلىق ايماعىنان جانە شەتەلدەن كەلگەن بەلدى بىلعارى قولعاپ شەبەرلەرى قاتىسادى دەپ كۇتىلۋدە.
«ايقىن»
