الماتىدا تورىندە تاعى ءبىر الەم بىرىنشىلىگى جالاۋىن جەلبىرەتپەك

الماتى. قازاقپارات - الماتىدا 18- جەلتوقسان كۇنى «مەدەۋ» سپورت كەشەنىنىڭ مۇز ايدىنىندا ستۋدەنتتەر اراسىندا كونكي تەبۋ سپورتى بويىنشا II الەم چەمپيوناتى باستالادى. ءتورت كۇنگە سوزىلاتىن جارىس بارىسىندا 500, 1000, 1500, 3000, 5000, 10000 مەترلىك قاشىقتىقتاردا، سونىمەن قاتار كوماندالىق وكشەلەي قۋالاۋ مەن ماسس-ستارت جارىسى بولادى.

بۇل تۋرالى «2017-جىلعى بۇكىل الەمدىك XXVIII قىسقى ۋنيۆەرسيادانىڭ ۇيىمداستىرۋ كوميتەتىنىڭ اتقارۋشى ديرەكسياسى» مەملەكەتتىك قورىنىڭ باسپا ءسوز قىزمەتىنەن حابارلادى.

قازاقستاننىڭ قۇراما كومانداسى 19 ادامنان تۇرادى. ەرلەر كومانداسىنىڭ قاتارىنا فەدور مەزەنتسيەۆ، ماكسيم باكلاشكين جانە دارسيل ەسسامامبو ەندى. ال ايەلدەر كومانداسىنىڭ كوشباسشىلارى - ەلەنا ۋرۆانتسيەۆا مەن تاتيانا سوكيركو. قازىرگى تاڭدا قۇراما كوماندا «مەدەۋ» مۇز ايدىنىندا دايىندىق جاتتىعۋلارىن وتكىزۋدە. الەم بىرىنشىلىگىنە قاتىسۋعا الەمدەگى ەڭ مىقتى كوماندالاردىڭ ءبىرى - نيدەرلاند قۇراماسى دا نيەت ءبىلدىردى. سونىمەن قاتار چەمپيوناتقا نورۆەگيا، يتاليا، پولشا، ەستونيا، بەلارۋس، رەسەي، قىرعىزستان جانە موڭعوليا قۇراما كوماندالارى دا قاتىسادى.

وتكەن اپتادا شۆەتسيا مەن قىتايلىق تايبەي دە قاتىساتىندىقتارىن راستاعان. بارلىعى الەمدىك دوداعا 15 ەلدەن 100 دەن اسا سپورتشى كەلەدى دەپ كۇتىلۋدە. ولاردىڭ ىشىندە الەم بىرىنشىلىكتەرى مەن 2013-جىلى يتاليانىڭ ترەنتينو قالاسىندا وتكەن 26- بۇكىل الەمدىك قىسقى ۋنيۆەرسيادانىڭ جۇلدەگەرلەرى دە بار.

سپورتشىلاردىڭ رەسمي جاتتىعۋى 17- جەلتوقسان كۇنى، ال 18- جەلتوقسان كۇنى تاڭعى ساعات 10.00-دە جارىس باستالادى. سورەگە الدىمەن ەرلەر كومانداسى، كەيىن ايەلدەر كوماندالارى شىعادى.

چەمپيوناتتىڭ العاشقى كۇنى سالتاناتتى شوۋ-باعدارلامالارمەن اياقتالادى. سونىمەن قاتار نيەت بىلدىرۋشىلەر كەشكە مۇز ايدىنىندا تەگىن كونكي تەبە الادى.

اۆتور: جاپپاربەرگەن ايبوتا