جاڭا تۇرعىن ءۇي باعدارلاماسى بويىنشا ءبىر شارشى مەتردىڭ بولجامدى باعاسى انىقتالدى
بۇل تۋرالى بۇگىن ق ر پارلامەنتى سەناتىندا ۇلتتىق ەكونوميكا ۆيتسە-ءمينيسترى قايىربەك وسكەنبايەۆ ايتتى.
ونىڭ مالىمەتىنشە، الماتى مەن استانا قالالارىنداعى جالعا بەرىلەتىن باسپانا باعاسى قىمباتىراق بولادى.
«جالعا بەرۋ قۇنى ءارتۇرلى بولادى. الماتى مەن استانادا ءسال قىمباتىراق بولادى، ويتكەنى مۇندا تۇرعىن ءۇي باعاسى قىمباتىراق. ماسەلەن، ءبىزدىڭ ەسەپتەۋىمىزشە بۇل ەكى قالادا باسپانا ساتىپ الۋ قۇنى شارشى مەترىنە 200 مىڭ تەڭگە، ال سالۋ قۇنى 185 مىڭ تەڭگە بولادى. ال ايماقتاردا ساتىپ الۋ 165 مىڭ، سالۋ 150 مىڭ تەڭگەنى قۇرايدى» - دەدى ول.
وسىلايشا استانا مەن الماتىداعى اي سايىنعى جالداۋ قۇنى 56 مىڭ تەڭگە توڭىرەگىندە بولادى.
«ايماقتار ءۇشىن بۇل باعا 40 مىڭ تەڭگە كولەمىندە بولادى. ەكى جاعدايدا دا ءۇي جالعا العان ادامنىڭ مەنشىگىنە وتەدى. ال مەنشىككە وتپەيتىن جالعا بەرىلەتىن ۇيلەر ءتىپتى ارزان بولادى» - دەدى ق. وسكەنبايەۆ.
ونىڭ ايتۋىنشا، باعدارلامادا ساتىپ الۋ قۇقىعىنسىز جالعا الۋ مەحانيزمدەرى دە قاراستىرىلعان.
«بىزدە تىزىمدە تۇرعان 300 مىڭ تۇرعىننىڭ 126 مىڭنان استامى الەۋمەتتىك از قامتىلعان حالىق ساناتىنان. ءبىزدىڭ ەسەپتەۋىمىز بويىنشا ولار ورتا ەسەپپەن ايىنا 65 مىڭداي تابىس تابادى. ال سول تابىستىڭ 40 نەمەسە 56 مىڭىن باسپاناعا تولەۋ تاعى دا ولاردى قيىندىققا الىپ كەلەدى. سوندىقتان، ءبىز باسپانانى ساتىپ الۋ قۇقىعىنسىز جالعا بەرۋ ەرەجەسىن دە ەنگىزەمىز. وندا ايىنا كوممۋنالدىق تولەمدەردى ەسەپتەمەگەندە شامامەن 26-27 مىڭ تەڭگە بولادى. بۇل ەكى بولمەلى پاتەرگە ارنالعان ەسەپ-قيساپ. ياعني، ءبىز وسى كريتەريدى نەگىزگە الدىق. ءبىر بولمەلى پاتەر بۇدان دا ارزانىراق بولادى» - دەدى ول.
اۆتور: ءابۋ-اسقار مەكەش ۇلى
