ەلۋ وقۋشىنى جول اپاتىنان قۇتقارعان ەكىباستۇز پوليتسەيى «جاس تۇلپار» سىيلىعىمەن ماراپاتتالدى

استانا. قازاقپارات - پاۆلودار وبلىسى ەكىباستۇز ىشكى ىستەر باسقارماسى جول- پاترۋل پوليتسياسى روتاسىنىڭ پوليتسەيى ارعىن قۋانوۆ «ازاماتتىق قاۋىپسىزدىك سالاسىنداعى كاسىبي قىزمەتى ءۇشىن» اتالىمىنىڭ «جاس تۇلپار» سىيلىعىمەن ماراپاتتالدى.

«نەگىزگى ماقساتىمىز - جاستارعا مۇمكىندىك جاساۋ. ءبىزدىڭ ارامىزدا وتە تانىمال جاستارىمىز از ەمەس. كەي كەزدەرى ولار تارتىنشاقتاپ، ءوزىن دامىتۋعا تالپىنبايدى. تاريحقا ۇڭىلسەك، كوپ ادامدار جاسىنا قاراماستان ۇلكەن جەتىستىكتەردىڭ باعىندىرعان. مۇنداي تۇلعالار ەلىمىزدە كوپتەپ كەزدەسەدى»، - «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك.

اتاپ ايتقاندا، ارعىن قۋانوۆقا سىيلىق 50 مەكتەپ وقۋشىسىن جول-كولىك وقيعاسىنان قۇتقارعان ەرلىگى ءۇشىن بەرىلدى. اعىمداعى جىلدىڭ قاراشاسىندا پاۆلودار وبلىستىق ىشكى ىستەر باسقارماسىنىڭ قىزمەتكەرى سوققىنى وزىنە قابىلداپ، جول-كولىك اپاتىنىڭ ورىن الۋىنا جول بەرمەگەن ەدى.

«قىزىلوردا - پاۆلودار كۇرە جولىندا ءبىز سەرىكتەسىمىز ەكەۋمىز 50 وقۋشىنى تاسىعان اۆتوبۋستى باستاپ الىپ جۇردىك. كەنەتتەن الدىمىزدان كولىك شىعا قالدى. ءبىز ەش ويلانباستان قارسى كەلگەن سوققىنى وزىمىزدىڭ كولىگىمىزبەن توسىپ قالدىق.

ەڭ باستىسى، بالالاردىڭ ەشقايسىسى دا زارداپ شەككەن جوق»، - دەپ ەسكە الادى بولعان وقيعانى ارعىن قۋانوۆ.

بۇگىن، استانادا ق ر تاۋەلسىزدىگى كۇنى قارساڭىندا «نۇر وتان» پارتياسىنىڭ 15 -جىلدىعىنا ارنالعان «جاس تۇلپار» سىيلىعىنىڭ Ⅱ- سالتاناتتى تابىس ەتۋ ءراسىمى ءوتتى.

اۆتور: رۋسلان عابباسوۆ