مىسىر تەلەارنالارىندا قازاق تەلەباعدارلامالارىن كورسەتۋ ءۇشىن ارنايى ەفير ۋاقىتى ءبولىندى
بۇل تۋرالى بۇگىن اقوردادا ق ر پرەزيدەنتى نۇرسۇلتان نازاربايەۆقا سەنىم گراموتاسىن تاپسىرۋ راسىمىنەن كەيىنگى بريفيگتە قازاقستانداعى مىسىر اراب رەسپۋبليكاسىنىڭ توتەنشە وكىلەتتى ەلشىسى حايسام سالاح كامەل يبراگيم ءمالىم ەتتى.
ەلشى مىرزا ءوز سوزىندە ەكى ەل اراسىنداعى مادەني جانە ءدىني بايلانىستار قارقىندى دامۋىمەن ءارى تابىستىلىعىمەن ەرەكشەلەنەتىندىگىن باسا ايتتى. سونىمەن قاتار ول وسى جىلدىڭ قاراشا ايىندا مىسىر ءدىن ىستەرى ءمينيسترىنىڭ الماتى جانە استانا قالالارىنا ساپار جاساعانىن ەسكە سالدى.
«مينيستر ءوز ساپارى اياسىندا الماتىداعى مىسىر- قازاقستان يسلام مادەنيەتى ۋنيۆەرسيتەتىندە بولدى. وسى ءبىلىم ورداسىندا ساباق بەرۋ ءۇشىن مىسىردىڭ ءال-اسقار ۋنيۆەرسيتەتىنىڭ جوعارى دارەجەلى وقىتۋشىلارى مەن بەلگىلى عالىمدارىن جىبەرۋگە كەلىسىمىن بەردى. سونداي-اق قازاقستاندىق ستۋدەنتتەر ءۇشىن ءال- اسقار ۋنيۆەرسيتەتىندە وقۋ گرانتتارىنىڭ سانىن كوبەيتۋ، قازاقستاندىق يمامدارعا ارنالعان مىسىردا ارنايى كۋرستار وتكىزۋ تۋرالى كەلىسىمشارتتار جاسالدى»، - دەدى ول.
ونىڭ ايتۋىنشا، قازىرگى ۋاقىتتا ق ر مادەنيەت جانە سپورت ءمينيسترى ارىستانبەك مۇحامەدي ۇلىمەن مىسىردىڭ فولكلورلىق- مۋزىكالىق ءانسامبلىنىڭ قازاقستانعا كەلىپ، استانا مەن الماتى قالالارىندا ءتۇرلى كونسەرتتەر بەرۋ ماسەلەسى پىسىقتالۋدا.
«سونىمەن قاتار قازاق تەلەباعدارلامالارىن مىسىر تەلەارنالارىندا كورسەتۋ ءۇشىن ۇكىمەت تاراپىنان ارنايى ەفير ۋاقىتى ءبولىندى»، - دەدى حايسام سالاح كامەل يبراگيم.
اۆتور: مارلان جيەمباي
