قىزىلوردادا وزگە ۇلت وكىلدەرى قازاقشا جىر وقىپ، ءان شىرقادى

قىزىلوردا. قازاقپارات - جاڭاقورعان اۋداندىق مادەنيەت ۇيىندە «مەن قازاق ەلىنىڭ ازاماتى رەتىندە ايتارىم بار» اتتى وزگە ۇلت وكىلدەرىنىڭ قاتىسۋىمەن دوڭگەلەك ۇستەل ءوتتى.

باسقوسۋ بارىسىندا №169-ورتا مەكتەپ ديرەكتورىنىڭ تاربيە ءىسى جونىندەگى ورىنباسارى و. شين، ءپان مۇعالىمى س. يزاتوۆا ەلىمىزدەگى تۇراقتىلىق پەن بەيبىتشىلىكتى اعىنان جارىلا اڭگىمەگە ارقاۋ ەتتى.

شارا قوناقتارى كەزىندە كورشى مەملەكەتتەرگە كوشۋگە ۇسىنىس ايتىلعاندا سانالى تۇردە باس تارتقاندىقتارىنا بۇگىندە ەش وكىنبەيتىندىكتەرىن جەتكىزدى. بۇل تۋرالى اۋداندىق اكىمدىكتىڭ باسپا ءسوز قىزمەتى حابارلادى.

كەزدەسۋدە الشەكەي اتىنداعى ونەر مەكتەبىنىڭ «كوركەم ءسوز وقۋ» ۇيىرمەسىنىڭ شاكىرتى اناستاسيا بولياسنيكوۆا م. ماقاتايەۆتىڭ ولەڭدەرىنەن تەبىرەنە جىر-شۋماقتارىن ورىندادى. ال ارميان ۇلتىنىڭ وكىلى لاۋرا اندرياسيان «اناشىم» ءانىن ناقىشىنا كەلتىرە اۋەلەتىپ، ودان ءارى ءوزىنىڭ دوڭگەلەك ۇستەل تاقىرىبى اياسىندا ويىن ورتاعا سالدى.

ءوز كەزەگىندە ءبولىم باسشىسى ءا. تولەگەنوۆ ەلباسىنىڭ «نۇرلى جول- بولاشاققا باستار جول» اتتى جولداۋىنداعى باسىم باعىتتارىن ايتا كەلە، كەلەسى جىلى ەلىمىزدە قازاقستان حالقى اسسامبلەياسىنىڭ 20  جىلدىعىن كەڭ كولەمدە اتالىپ وتىلەتىندىگى جونىندە ءسوز ەتتى.

جيىندى قورىتىندىلاعان مودەراتور وبلىس اكىمى اپپاراتىنىڭ قوعامدىق كەلىسىم ورتالىعىنىڭ اۋدان بويىنشا ۇلتارالىق قاتىناستار جونىندەگى ەكسپەرتى ب. وتەبايەۆ ايرانداي ۇيىپ وتىرعان ۇلتارالىق تاتۋلىق مەن دوستىقتى ناسيحاتتاۋ ءبىزدىڭ باستى ماقساتىمىز دەپ تۇيىندەدى.

سوڭىندا ۇيىمداستىرۋشى تاراپ قوناقتارعاتاۋەلسىزدىك مەرەكەسىنىڭ لەبىزى جازىلعان «العىس حاتتار» تابىستادى.

اۆتور: ەلۋباي اۋەزوۆ