الماتىدا جازۋشى گەرولد بەلگەردىڭ «تاڭدامالى» كىتابىنىڭ تۇساۋكەسەرى ءوتتى
تۇساۋكەسەرگە مادەنيەتتانۋشى، قوعام قايراتكەرى مۇرات اۋەزوۆ، جازۋشى، ۇلتتىق كىتاپحانانىڭ باس ديرەكتورى الىبەك اسقار، جازۋشى، اۋدارماشى بەرىك جىلقىبايەۆ، جازۋشى دۋلات يسابەكوۆ، اقىن ۇلىقبەك ەسداۋلەت، باقىتجان قاناپيانوۆ، ج و و ستۋدەنتتەرى قاتىستى. كوپشىلىك قاۋىم جازۋشىنى كەلە جاتقان 80 جىلدىق مەرەيتويىمەن قۇتتىقتاپ، جازۋشىنىڭ قازاق ادەبيەتىنە قوسقان ۇشان- تەڭىز ۇلەسىن اتاپ ءوتتى.
جاڭا تۋىندى قازاقتاردىڭ كوپ قىرلى ءومىرى مەن رەسەيلىك نەمىستەردىڭ ازاپتى جولىن سۋرەتتەگەن. كىتاپ «راۋان» باسپاسىندا 42 باسپاتاباقپەن شىعارىلدى.
كىتاپتا اڭگىمەلەر، ەسسەلەر، ەسكيزدەر مەن ەتيۋدتەر توپتاستىرىلعان.
«ءبىز ەستىپ جۇرگەن سوزدەردىڭ كوپشىلىگى قالانىڭ جانتالاسقا تولى ماعىناسىز ومىرىندە ءوز قۇنىن جوعالتىپ الدى دەسەك بولادى. سوزگە ەرەكشە قۋات بەرىپ، جان بىتىرەتىن ادامدار بولادى. سولاردىڭ ءبىرى رەتىندە گەرولد بەلگەردى ايتار ەدىم. ول ايتقان كەزدە ءار نارسە ءوزىنىڭ تۇپكىلىكتى ءاۋ باستان ءتان سيپاتىنا يە بولادى. مەن ءسىزدى پىشاق قايراۋشىمەن سالىستىرار ەدىم. ءسىز بىزگە تەك ءسوز قايراۋدان شىققان وت پەن ۇشقىن بەرمەيسىز، ءسىز سونداي- اق، ونى قاجەتتى قالپىنا كەلتىرەسىز، وعان ءمان- ماعىنا بەرەسىز» ، - دەدى مادەنيەتتانۋشى مۇرات اۋەزوۆ.
شارا بارىسىندا، سونداي- اق، ۇلتتىق كىتاپحانا قورىنان اۆتوردىڭ شىعارماشىلىعىنا ارنالعان «گەرولد بەلگەر» اتتى كىتاپ كورمەسى ۇيىمداستىرىلدى.
اۆتور: گۇلميرا عوسمانالي
