كوركەم اۋدارماعا كوڭىل بولىنبەگەندىكتەن قازاق ادەبيەتى الەمگە تانىلماي وتىر - ا. سمايىل
دەپۋتات الدان سمايىلدىڭ ايتۋىنشا، قازاق ادەبيەتى باي ادەبيەت بولعانىمەن، ول الەمگە ەركىن تانىلماي وتىر.
«شىعارمالارى حالىقارالىق بەدەلدى تىلدەرگە اۋدارىلعان قازاق قالامگەرلەرى ساۋساقپەن سانارلىق. ونىڭ وزىندە، سول تۋىندىلاردىڭ اۋدارماسى تاماشا دەپ ەشكىم ايتا المايدى. ويتكەنى، بىزدە اعىلشىن، يسپان، فرانسۋز، نەمىس، قىتاي سەكىلدى ءوتىمدى تىلدەردە كوركەم اۋدارما جاسايتىن كاسىبي اۋدارماشىلار بولعان ەمەس جانە قازىر دە جوق. ولاردى دايارلاۋعا ىنتالى بولىپ وتىرعان مەملەكەتتىك قۇرىلىمداردى دا تابا المايسىز»، - دەيدى دەپۋتات.
سونىمەن قاتار، حالىق قالاۋلىسى ەۋرازيا ۇلتتىق ۋنيۆەرسيتەتى نەمەسە ءال- فارابي اتىنداعى قازاق ۇلتتىق ۋنيۆەرسيتەتىندەگى فيلولوگيا فاكۋلتەتتەرىنەن كوركەم اۋدارما ءبولىمىن اشۋ تۋرالى ۇسىنىس بۇعان دەيىن كوتەرىلگەنىن، الايدا ونداي شەشىم ءالى قابىلدانباي وتىرعانىن ايتىپ، قىنجىلىس ءبىلدىردى.
«مۇنداعى باستى كىنارات ادەبيەتكە، ۇلتتىق رۋحاني قۇندىلىقتارىنا، حالىقتىڭ ابىروي- بەدەلىنە جاناشىرلىقپەن قاراي بىلمەۋدە. مۇناي مەن تەمىر كىمدە جوق، تالايلاردا بار. ال پۋشكين مەن اباي، بالزاك پەن اۋەزوۆ، شەكسپير مەن ماحامبەت بىرەن- ساران ۇلتتىڭ عانا ەنشىسىندە»، - دەگەن دەپۋتات ماسەلەنى ءتۇرلى سىلتاۋمەن سوزا بەرۋگە بولمايتىنىن العا تارتادى.
وسىعان وراي، ا. سمايىل ەۋرازيا ۇلتتىق ۋنيۆەرسيتەتىنىڭ فيلولوگيا فاكۋلتەتىنەن كوركەم اۋدارما ءبولىمىن، سونداي- اق قازاقستاننىڭ شەتەلدەگى ەلشىلىكتەرى جانىنان «قازاق ادەبيەتى» كىتاپحاناسىن اشۋ ماسەلەسىن كوتەردى. «ەلشىلىكتەر جانىنداعى ونداي كىتاپحانالارعا بۇگىنگە دەيىن شەت تىلىنەن اۋدارىلعان كوركەم جانە عىلىمي- كوپشىلىك، تاريحي ادەبيەتتەر جيناقتالسا، اقىن- جازۋشىلاردىڭ كەشتەرى مەن ءتۇرلى تاقىرىپتاعى كونفەرەنسيالار ءوتىپ تۇرسا، قازاق رۋحانياتى سىرت مەملەكەتتەردە رۋحاني شاڭىراققا اينالار ەدى. قازاق ادەبيەتىنە كوپتەگەن ەلدەردىڭ نازارىن اۋدارار ەدىك»، - دەدى ا. سمايىل.
اۆتور: قانات مامەتقازى ۇلى
