قازاقستان قىتاي حالىق رەسپۋبليكاسىنىڭ دوستىق قاتىناستى جوعارى باعالايتىن سەنىمدى سەرىكتەسى- ن. نازاربايەۆ
«قازاقستان قىتاي حالىق رەسپۋبليكاسىنىڭ دوستىق قاتىناستى جوعارى باعالايتىن سەنىمدى ستراتەگيالىق سەرىكتەسى. ءبىز ءداستۇرلى تاتۋ كورشىلىكتى، ءوزارا سەنىمدى نىعايتىپ، جان- جاقتى سەرىكتەستىكتى كەڭەيتۋگە نيەتتىمىز. بۇل ورايدا قىتاي حالىق رەسپۋبليكاسىنىڭ مەملەكەتتىك كەڭەسىنىڭ پرەمەرى لي كىشياڭ ەلىمىزگە الداعى ساپارىنىڭ ءمانى زور»، - دەدى ن. نازاربايەۆ.
«نۇرلى جول» اتتى جاڭا ەكونوميكالىق ساياساتىمىزدى ىسكە اسىرۋدامىز. ءبىز يندۋستيرالدى- يننوۆاتسيالىق باعدارلامامىزدىڭ ەكىنشى كەزەڭىن ىسكە اسىرۋدى باستادىق. ءبىزدىڭ الداعى ماقساتىمىز - كولىك ينفراقۇرىلىمىن دامىتىپ، ازيا مەن ەۋروپانى جالعايتىن جول جاساۋ. قازاقستان ورتالىق ازيانىڭ ەڭ ءىرى ترانزيتتىك- كولىكتىك، لوگيستيكالىق حابى بولادى» ، - دەدى قر پرەزيدەنتى.
سونىمەن قاتار، ەلباسى استانا حالىقارالىق «ەكسپو-2017» كورمەسىن وتكىزۋگە دايىندالىپ جاتقانىن، بۇل كورمە بولاشاقتىڭ ەنەرگياسى دەگەن تاقىرىپپەن ۇيىمداستىرىلاتىندىعىن ەسكە سالىپ ءوتتى.
«قازاقستان-2050» ستراتەگياسى شەتەلدىك سەرىكتەستەرمەن دە ءتيىمدى ىنتىماقتاستىقتى قاراستىرادى. ەڭ الدىمەن ينۆەستيتسيالىق بايلانىس، تەحنولوگيا الماسۋ سالالارىنا ءمان بەرىلەدى. يننوۆاتسيالار مەن وزىق تاجىريبەلەردى يمپورتتاۋ، ەلدىڭ ءونىم ەكسپورتىن ۇلعايتۋ ماسەلەلەرى نازاردا بولادى» ، - دەگەن مەملەكەت باسشىسى جاڭا ەلشىلەردىڭ قىزمەتتەرى ەكىجاقتى بايلانىستاردى بارىنشا ارتتىراتىندىعىنا سەنەتىندىگىن باسا ايتتى.
ايتا كەتەيىك، بۇگىن ق ر پرەزيدەنتىنە يتاليانىڭ توتەنشە جانە وكىلەتتى ەلشىسى ستەفانو راۆانيان، شۆەتسيا ەلشىسى كريستيان كاميلل، چەح ەلشىسى ەليشكا جيگوۆا، ليتۆا ەلشىسى ۆيتاۋتاس ناۋدۋجاس، مىسىر ەلشىسى حايسام سالاح كامەل يبراگيم، ءۇندىستان ەلشىسى حارش كۋمار دجاين، ماكەدونيا ەلشىسى يليا پسالتيروۆ، قىتاي ەلشىسى چجان حانحۋەي سەنىم گراموتالارىن تابىس ەتكەن بولاتىن.
