09:26, 10 - جەلتوقسان 2014 | GMT +5
ۆەنەسۋەلا قارۋلى كۇشتەرى ەكى بەلگىسىز ۇشاقتى اتىپ ءتۇسىردى
استانا. قازاقپارات - ۆەنەسۋەلا قارۋلى كۇشتەرى ەلدىڭ اۋە كەڭىستىگىندەگى ەرەجەنى بۇزعان ەكى بەلگىسىز ۇشاقتى اتىپ ءتۇسىردى، دەپ حابارلادى ي ت ا ر- ت ا س س.
بۇل تۋرالى Twitter الەۋمەتتىك جەلىسىندە ەلدىڭ قورعانىس ءمينيسترى ۆلاديمير پادرينو لوپەس حابارلادى.
مينيستر جەڭىل موتورلى ۇشاقتان قالعان بولشەكتەردىڭ سۋرەتىن كورسەتكەنىمەن، ەكيپاج مۇشەلەرىنىڭ تاعدىرى جايلى ءسوز قوزعامادى.
ۆەنەسۋەلانىڭ ۇلتتىق اسسامبلەياسى 2012 - جىلدىڭ مامىرىندا اۋە كەڭىستىگىن قورعاۋ تۋرالى زاڭ قابىلداعان. وعان سايكەس قارۋلى كۇشتەر اسكەري ۇشقىشتاردىڭ ۇشاقتى قوندىرۋ تالابىن ورىنداماعان جاعدايدا ونى جارۋعا قۇقىلى. سودان بەرى ۆەنەسۋەلالىق اسكەريلەر اۋە كەڭىستىگىن بۇزعان جەڭىل موتورلى ۇشاقتارعا ۇنەمى وق جاۋدىرۋدا. ۇشقىشتاردىڭ ۇشاقتى قوندىرۋدان باس تارتقانىنا قاراعاندا، ولار اۋە كولىكتەرىمەن كولۋمبيادان ورتالىق امەريكا نەمەسە مەكسيكاعا ەسىرتكى تاسىمالداعان دەگەن بولجام بار.
