بۇگىن - ەل استاناسى الماتىدان اقمولا قالاسىنا كوشىرىلگەن كۇن
قازاقستان رەسپۋبليكاسىنىڭ جوعارى كەڭەسى استانانى اۋىستىرۋ تۋرالى شەشىمدى 1994-جىلدىڭ 6- شىلدەسىندە قابىلداعان بولاتىن. وسىدان كەيىن دايىندىق جۇمىستارى جۇرگىزىلە باستادى. قۇرىلىس قارقىنىن ارتتىرۋ ءارى ينفراقۇرىلىمىن دامىتۋ ماقساتىندا 1997-جىلى اقمولا قالاسىندا (قازىرگى استانا) اقمولا ارنايى ەكونوميكالىق ايماعى قۇرىلدى. ول بەلگىلى ءبىر دەڭگەيدە جاڭا ەلوردانىڭ دامۋىنا ءوز سەپتىگىن تيگىزدى. ق ر پرەزيدەنتىنىڭ استانانى كوشىرۋ تۋرالى جارلىعى جارىققا شىققاننان كەيىن الماتىدا اقمولاعا مەملەكەتتىك ورگانداردى قونىستاندىرۋ جۇمىستارى باستالدى.
1998-جىلدىڭ 6- مامىرىندا قازاقستان رەسپۋبليكاسىنىڭ پرەزيدەنتىنىڭ قاۋلىسى بويىنشا، اقمولا اتاۋى استانا بولىپ وزگەردى. استانا قالاسىنىڭ قازاق ەلىنىڭ جاڭا استاناسى رەتىندە حالىقارالىق تانىستىرىلىمى 1998-جىلى 10- ماۋسىمىندا ءوتتى.
استانا كۇنى 6- شىلدە كۇنى اتالىپ وتىلەدى. ويتكەنى ءدال وسى كۇنى قازاقستان رەسپۋبليكاسىنىڭ جوعارى كەڭەسى استانانى الماتىدان اقمولا اۋىستىرۋ تۋرالى شەشىم قابىلداعان بولاتىن. بۇل كۇن مەملەكەتتىك مەرەكە بولىپ سانالادى. 1999-جىلى يۋنەسكو-نىڭ شەشىمى بويىنشا استانا قالاسىنا «بەيبىتشىلىك قالاسى» جوعارى اتاعى بەرىلىپ، مەدالمەن ماراپاتتالدى. بۇل اتاق قىسقا مەرزىم ىشىندە الەۋمەتتىك-ەكونوميكالىق، ساياسي جانە مادەني دامۋدا نەعۇرلىم اسەرلى ءارى قۋاتتى وسۋگە، تۇراقتى ەتنيكاارالىق قاتىناستى ورنىقتىرۋعا قول جەتكىزە العان عالامشاردىڭ جاس قالالارىنا بەرىلەدى. برازيليادا وتكىزىلگەن بۇل كونكۋرستا استانا بارلىق ولشەمدەر بويىنشا الەمنىڭ ءار ءتۇرلى ەلدەرىنىڭ ون ەكى قالاسىن باسىپ وزدى.
1998-جىلى استانا ەركىن ەكونوميكالىق ايماقتىڭ WEPSA حالىقارالىق قاۋىمداستىعىنا كىردى. الەمنىڭ 15 قالاسى قازاقستان ەلورداسىنىڭ باۋىرلاس قالالارى بولىپ تابىلادى، ولاردىڭ اراسىندا ماسكەۋ، بەرلين، ۆارشاۆا، مينسك، كيەۆ، انكارا، شياڭگاڭ جانە باسقالارى بار.
بۇگىندە استانا ءتۇرلى حالىقارالىق دەڭگەيدەگى شارالاردى وتكىزەتىن ورتالىققا اينالىپ ۇلگەردى. ماسەلەن، 2010-جىلى ەلوردادا 11 جىلدىق توقىراۋدان كەيىن ە ق ى ۇ سامميتى ۇيىمداستىرىلىپ، وتە جوعارى دەڭگەيدە وتكىزىلدى. سونىمەن قاتار وتكەن جىلى 7- قىسقى ازيادا ويىندارى دا جوعارى تالاپقا ساي ۇيىمداستىرىلدى. الەمدىك جانە ءداستۇرلى دىندەر كوشباسشىلارىنىڭ سەزى دە تۇراقتى وتكىزىلىپ كەلەدى. استانا الداعى ۋاقىتتا دا وسىنداي جوعارى دەڭگەيدەگى شارالاردى وتكىزۋ ورنىنا اينالادى. بۇدان بولەك، استانا 2017 -جىلى EXPO-2017 حالىقارالىق مامانداندىرىلعان كورمەنى جوعارى دەڭگەيدە وتكىزۋگە بارىن سالاتىن بولادى.
