ورمانشىلار شىرشانى كەسۋگە سالىنعان موراتوريدى الىپ تاستاۋدى سۇرايدى

استانا. قازاقپارات - شىعىس قازاقستاندىق ورمانشىلار شىرشا كەسۋگە سالىنعان موراتوريدى الىپ تاستاۋدى سۇرايدى.

"شەكتەۋ قويىلعالى بەرى ورماندا قۇلاعان، اۋىرعان قىلقان جاپىراقتىلار كوبەيىپ كەتتى"، - دەيدى.

ال مۇنى وزدەرى تازالاپ ۇلگەرە الماي جاتسا كەرەك. ونىڭ ۇستىنە حالىقتىڭ سۇرانىسىن ءبارىبىر رەسەيلىكتەر وتەپ جاتىر. سوندىقتان ورمانشىلار تابىستان قاعىلعانشا، شىرشا كەسۋگە رۇحسات بەرۋ كەرەك دەپ وتىر.

ورمانشىلاردىڭ ايتۋىنشا، بۇگىندە جاڭا جىلعا قارسى شىرشا كەسۋشىلەردىڭ سانى مۇلدە جوق كورىنەدى. سالىنعان موراتوريگە سايكەس، ونى زاڭسىز وتاعاندار مەملەكەتكە 30 مىڭ تەڭگەگە دەيىن ايىپپۇل تولەيدى. سوندىقتان زاڭدى تۇردە شابىلعاندارى كورشىلەس رەسەي ەلىنەن كوپتەپ تاسىمالدانۋدا.

ال جاڭا جىل سايىن قىلقان جاپىراقتىعا دەگەن سۇرانىستىڭ ارتاتىنى ءسوزسىز. وسىعان وراي، ورمانشىلار ەرەكشە باستاما كوتەردى. "اتالمىش موراتوريدى الىپ تاستاۋ كەرەك"، - دەيدى. ويتكەنى ماماندار جىل سايىن اۋىرعان شىرشالاردى ونسىز دا كەسۋگە ءماجبۇر ەكەن. ەگەر تىيىم سالىنباعاندا ونى ساتۋعا ابدەن بولار ەدى دەپ وتىر.

اندرەي لاپشين، تاۋلى ءۇلبى ورمان شارۋاشىلىعىنىڭ ورمانشىسى:

- اۋىرعان جانە قۇلاپ قالعان شىرشالاردىڭ بارلىعىن كەسىپ جاڭا جىل مەرەكەسىندە ىسكە جاراتۋعا بولادى. اعاشتىڭ ساباقتارىنان دا مەرەكە كوركىن كەلتىرەتىن شىرشا جاسايدى. بۇل ءۇردىس كەرىسىنشە ورماننىڭ وسۋىنە وڭ سەپتىگىن تيگىزەدى.

سوندىقتان ورمانشىلار "جۇرت جاساندى شىرشادان جاپپاي باس تارتسىن"، - دەيدى. سەبەبى، ونىڭ زياندى جاقتارى كوپ ەكەن- مىس.

ۆيتالي چەرنەتسكي، ش ق و تابيعات پايدالانۋدى رەتتەۋ باسقارماسى باسشىسىنىڭ ورىنباسارى:

- جاساندى شىرشالار كومىرسۋتەگىن 54-56 ەسە كوپ شىعارادى. زاۋىتتار ونى جاساۋدا كوپتەگەن زياندى زاتتاردى جاعادى. سونىمەن بىرگە پايدالانىپ بولعاننان كەيىن ونى قورشاعان ورتاعا اسەر كەلتىرمەيتىندەي قىپ جويۋ قاجەت.

الايدا، ورمانشىلاردىڭ ايتۋىنشا، موراتوريدى الىپ تاستاۋ كەرەك دەگەن باستامالارىن قۇقىققورعاۋ ورگاندارىنىڭ وكىلدەرى قولداماي وتىر ەكەن. ويتكەنى بۇرىن زاڭسىز اعاش كەسۋشىلەردىڭ اراسىندا ءوز ارىپتەستەرى دە بولىپ، ۇستالىپ قالىپتى.

شىعىس قازاقستان وبلىسى

tv7.kz