ءاربىر قازاق ءوزىنىڭ ءتىلى ءۇشىن كۇرەسۋى ءتيىس- سۇلتان ورازالى

استانا. قازاقپارات - ءاربىر قازاق ءوزىنىڭ ءتىلى ءۇشىن كۇرەسۋى ءتيىس. بۇل پىكىردى بۇگىن ەلىمىزدىڭ تاۋەلسىزدىك كۇنىنە وراي ۇيىمداستىرىلعان «مەملەكەتتىلىك جانە ءتىل» اتتى دوڭگەلەك ۇستەل وتىرىسىندا قازاقستاننىڭ ەڭبەك سىڭىرگەن قايراتكەرى، جازۋشى سۇلتان ورازالى ءبىلدىردى.

«قازاق ءتىلىن دامىتۋدىڭ ەكى عانا جولىن بىلەمىن. بىرىنشىدەن، بالانىڭ سانىن كوبەيتۋىمىز كەرەك. ياعني، سانىمىزدى ارتتىرۋ قاجەت. جان- جاقتاعى قازاقتاردى جيناۋعا جانە باسقا ۇلتتاردى ءوز قاتارىمىزعا سىڭىرۋگە ءتيىستىمىز. ەكىنشى جولى - ءتىل. ءتىلدى حالىق جاسايدى. ءتىل ءۇشىن انا وتىرعان كوميتەتتىڭ ءتوراعاسى، نە بولماسا مينيستر نەمەسە ءتىل سالاسىندا ەڭبەك ەتەتىن ادامدار عانا جاۋاپتى دەۋگە بولمايدى. ءاربىر قازاق ءوزىنىڭ ءتىلى ءۇشىن كۇرەسۋى ءتيىس. سوندا عانا ءبىز ءوز مۇراتىمىزعا جەتەمىز» ، - دەدى س. ورازالى.

ال رەسپۋبليكالىق ارداگەرلەر كەڭەسىنىڭ ءتوراعاسى، تاريح عىلىمىنىڭ دوكتورى، پروفەسسور ءومىرزاق وزعانبايەۆ قازاق ءتىلىنىڭ رۋحاني- ۇلتتىق، قوعامدىق- ساياسي باسىمدىعى جايىندا كەڭىنەن ءسوز قوزعادى.

«ءبىز قازاقستاندا قالىپتاسقان مەملەكەت قۇردىق. قالىپتاسقان مەملەكەتتىڭ قالىپتاسقان ءتىلى بولۋى كەرەك. بۇل زاڭدى قۇبىلىس. مەملەكەتتىڭ رامىزدەرى تۋى، ەلتاڭباسى، ءانۇرانى سەكىلدى مەملەكەتتىك ءتىل دە ەلدىڭ ەڭ باستى رامىزدەرىنىڭ ءبىرى دەپ ەسەپتەيمىن»، - دەدى ول.

 دوڭگەلەك ۇستەل وتىرىسىنا ق ر پارلامەنتىنىڭ دەپۋتاتتارى، مادەنيەت جانە سپورت مينيسترلىگىنىڭ وكىلدەرى، قازاق مەملەكەتتىلىگىنىڭ تاريحى، مادەني رۋحاني مۇرالارى بويىنشا قۇندى ءارى وزەكتى ماتەريالدار جيناپ جۇرگەن بەلگىلى تاريحشى، ادەبيەتشى عالىمدار مەن قالامگەرلەر قاتىستى.

  اۆتور: مارلان جيەمباي