17:57, 09 - جەلتوقسان 2014 | GMT +5
حالىقارالىق تەمىرجول بيلەتتەرىن ارزان باعامەن ساتىپ الۋعا مۇمكىندىك جاسالادى
استانا. قازاقپارات - حالىقارالىق تەمىرجول بيلەتتەرىن ەرتە ساتىپ الۋشىلارعا «قازاقستان تەمىر جولى» 30 پايىز جەڭىلدىك جاسايتىن بولادى.
بۇل تۋرالى بۇگىن باسپا ءسوز ءماسليحاتىندا «جولاۋشىلار تاسىمالى» ا ق جەدەل جۇمىس قىزمەتىنىڭ باسشىسى جامبىل بايدەلدينوۆ ءمالىم ەتتى.
ونىڭ ايتۋىنشا، مۇنداي مۇمكىندىك 2015 - جىلدان باستاپ قولجەتىمدى بولادى.
«ءبىز بۇگىندە بيلەتتەردىڭ باعاسىن وڭتايلاندىرۋ بويىنشا جۇمىستار اتقارۋدامىز. ءبىرىنشى كەزدە ول جەڭىلدىك جاساۋ تەتىكتەرىنە قاتىستى بولىپ وتىر. 2015 - جىلى 11- قاڭتاردان باستاپ، حالىقارالىق دەڭگەيدەگى تەمىرجول قاتىناستارىنا 30 پايىزدىق جەڭىلدىك جاساۋ باعدارلامالارى جاسالماق. ەگەر جولاۋشى الدىن الا ساتىپ السا، بيلەت باعاسى تومەن بولادى»، - دەدى ج. بايدەلدينوۆ.
اۆتور: جاسۇلان جولدىبايەۆ
