ا ق ش-تىڭ بۇرىنعى پرەزيدەنتى لينكولننىڭ حاتى
سول حاتتاعى ءسوزى كۇنى بۇگىنگە دەيىن ءوزىنىڭ وزەكتىلىگىن جويماعانى ءتانتى ەتەدى. قۇلاق ءتۇرىڭىز:
«بالامنىڭ بارلىق ادام بىردەي ادىلەتتى ەمەس، ءار ادام شىنايى بولمىسقا يە بولمايتىنىن بىلۋگە ءماجبۇر ەكەنىن تۇسىنەم. ءبىراق وعان ءار وڭباعانعا قارسى تۇرار ءبىر باتىر، ءوزىمشىل ساياساتكەردى سازعا وتىرعىزار ادال كوشباسشى تابىلاتىنىن ءتۇسىندىرىڭىز. ەگەر دۇشپان بار بولسا، وندا دوس تا تابىلادى دەپ ۇيرەتىڭىز.
مۇنىڭ بارلىعىن سانامەن ءتۇسىنۋ ءۇشىن كوپ ۋاقىت قاجەت ەكەنىن تۇسىنەمىن. ماڭداي تەرىمەن تاپقان ءبىر دوللار جولدان تاۋىپ العان بەسەۋدەن ارتىق ەكەنىن ءتۇسىنىپ ءوسسىن. ءسىز وعان كەرەك كەزىندە جەڭىلە ءبىلۋ مەن ءوز جەڭىستەرىنە رياسىز قۋانۋدى ۇيرەتىڭىز. قولىڭىزدان كەلسە ونى جالعان كۇلۋدەن بويىن اۋلاق ۇستاپ، تەك شىنايى تۇردە جىميۋدىڭ قۇپياسىن كورسەتىڭىز. ماقتانشاقتار مەن بۇزىقتاردى جەڭۋ وتە وڭاي ەكەنىن ەرتەرەك بىلۋگە باۋلىڭىز. شاماڭىز جەتسە، كىتاپپەن دوستاسۋىنا كۇش سالىڭىز... اراسىندا ماڭگىلىك قۇپيالار تۋرالى ويلاناتىن بوس ۋاقىتى بولسىن. اسپانداعى قۇستى، ومارتاداعى ارانى باقىلاسىن، اتقان تاڭ مەن كوك شالعىننىڭ كەرەمەتىنە كوز جەتكىزسىن.
مەكتەپ قابىرعاسىندا جۇرگەندە الاياقتىق جاساعاننان گورى جەڭىلىس تاپقان الدەقايدا مارتەبەلى بولاتىنىن ۇيرەتسەڭىز ەكەن. وزگەلەر بۇرىستىعىن دالەلدەپ تۇرسا دا ءوز مەنىنە دەگەن سەنىمى نىق بولۋعا تاربيەلەڭىز.
جۇمساق ادامدارمەن جۇمساق، قاتىگەز ادامدارمەن قاتال بولۋعا ۇيرەتىڭىز. مەنىڭ ۇلىما توبىرعا ىلەسىپ جاڭساق باسۋدان ساقتايتىن رۋحاني قۋات بەرىڭىز. كەز كەلگەندى تىڭداپ، ءار ءسوزدىڭ ءمانى مەن ماعىناسىن ءتۇسىنىپ، ەلەكتەن وتكىزىپ، تەك دۇرىسى مەن اقيقاتىن تاڭداۋعا داعدىلاندىرىڭىز.
قايعىرىپ وتىرىپ تا كۇلە بىلۋگە بولاتىنىن كورسەتىڭىز... كوز جاسىن كورسەتۋ ۇيات ەمەستىگىن ءتۇسىندىرىڭىز. ارسىزداردىڭ قىلىعىنا كۇلە ءبىلسىن، ماقتانعا بوي ۇيرەتپەسىن. ءوز اقىلى مەن كۇش-قۋاتىن ەڭ جوعارى باعاعا ساتۋدى ۇيرەتىڭىز. ءبىراق ەشقاشان جۇرەك پەن جانىن ساۋداعا سالماسىن. ىسقىرىعى جەر جاراتىن بوسكەۋدەلەردى تىڭداماۋعا، وزىنىكىن دۇرىس دەپ بىلسە، ورنىنان تۇرىپ كۇرەسۋگە بەل شەشىپ كىرىسسىن.
وعان مەيىرىمدى بولىڭىز. دەگەنمەن، تىم جۇمساقتىق تانىتا بەرمەڭىز. ويتكەنى، تەك وتقا سالعان قۇرىش مىقتى بولىپ شىعادى. ۇلىما ىمىراسىزدىققا باراتىن باتىلدىق بەرىڭىز. قايراتتى بولۋعا رۇقسات ەتىڭىز. ءاردايىم وزىنە دەگەن سەنىمى نىق بولسىن. تەك سوندا عانا ونىڭ ادامگەرشىلىككە دەگەن سەنىمى زور بولماق.
مەنىڭ ايتقانىمدى ورىنداۋ وڭاي ەمەس. قولىڭىزدان كەلگەنىن جاساپ كورىڭىز. مەنىڭ كىشكەنتاي ۇلىم سونداي جاقسى بالا!»
«ۇستازدىڭ شەبەرلىگى» كىتابىنان
اۋدارعان شىنار ءابىلدا
anatili.kz
