نۇرسۇلتان نازاربايەۆ فرانسيا پرەزيدەنتىن پۋتينمەن كەزدەسۋگە قالاي كوندىردى؟
«فرانسيا پرەزيدەنتىنىڭ قازاقستاننان قايتار جولدا ماسكەۋگە جول- جونەكەي سوعا كەتۋىنە كەڭەس بەرگەن قازاقستان پرەزيدەنتى نۇرسۇلتان نازاربايەۆ، وسىلايشا، باتىس پەن رەسەيدىڭ تىلدەسۋىنە سەبەپكەر بولدى» ، - دەپ جازادى فرانسۋزدىڭ Le Figaro باسىلىمى.
فرانسيا پرەزيدەنتى پۋتينمەن كەزدەسۋگە نەگە كەلىستى جانە نۇرسۇلتان نازاربايەۆ وللاندتى بۇعان قالاي كوندىردى؟
پۋتينمەن كەزدەسكەن فرانسۋا وللاند ەلگە قايتا سالىسىمەن انگەلا مەركەلگە ۋكراينا ماسەلەسى بويىنشا كەلىسسوزدەر «العا باسقانىن» مالىمدەدى. ەليسەي سارايى ءتىپتى تيەسىلى حاتتاما شىعارىپ تا ۇلگەرگەن. ال ەۋروپالىق مەملەكەتتەر ليدەرلەرى قول جەتكىزىلگەن جەتىستىكتى نىعايتۋ كەرەك دەگەن پىكىرلەرىن بىلدىرگەن. جۋىردا بريسبەندە وتكەن سامميتتەن كەيىن جانە ميسترالدارعا (سوعىس كەمەسىن رەسەيگە ساتىپ بەرمەۋگە) قاتىستى كيكىلجىڭنەن سوڭ، وللاند پەن پۋتيننىڭ كەزدەسۋى ەكىتالاي بولاتىن. الايدا، فرانسيا ليدەرىن جول- جونەكەي ماسكەۋگە بارىپ قايتۋعا كوندىرگەن قازاقستان پرەزيدەنتى نۇرسۇلتان نازاربايەۆتىڭ ىقپالىمەن، كەزدەسۋ مۇمكىن بولدى. فرانسۋزدىق لە فيگارو باسىلىمى، فرانسۋا وللاندتىڭ قازاقستانعا ساپارى پۋتينمەن كەزدەسۋگە سەبەپكەر بولدى دەپ جازعان.
LE FIGARO:
الدە نەدەن قاۋىپتەنىپ وتىرعانداي سىڭاي تانىتپاس ءۇشىن فرانسيالىق پرەزيدەنت وللاند ديالوگ بارىسىندا نازاربايەۆتىڭ ايتقاندارىمەن كەلىسىپ وتىردى. كورشىلەس ارىپتەسىن جاقسى تانيتىن قازاقستان باسشىسى، وللاند پەن پۋتيننىڭ كەزدەسۋىن دە ۇيىمداستىرۋعا كومەكتەستى.
كەيبىرەۋلەر ءۇشىن فرانسيا مەن رەسەي پرەزيدەنتتەرىنىڭ كەزدەسۋى ماڭىزسىز بولىپ كورىنۋى ىقتيمال. كوپشىلىك قوس پرەزيدەنتتىڭ اۋەجايداعى بىرنەشە مينۋتتىق تىلدەسۋى، ۋكراينالىق ماسەلەدە وزگەرىس كەزەڭى باستالعانىن اڭعارتپايدى دەگەن. ال بريتاندىق The Daily Star باسىلىمى، وللاند پەن پۋتيننىڭ كەزدەسۋىنەن بۇرىن رەسەي مەن قازاقستان باسشىلارىنىڭ تەلەفون ارقىلى نە تۋرالى سويلەسكەندىگى قىزىعىراق، دەيدى.
THE DAILY STAR:
جۇما كۇنى كرەمل پۋتين مەن نازاربايەۆتىڭ تەلەفون ارقىلى تىلدەسكەنىن مالىمدەدى. اڭگىمە بارىسىندا پرەزيدەنتتەر حالىقارالىق جانە ايماقتىق ماسەلەلەردى تالقىلاعان. سونداي- اق، پۋتين مەن نازاربايەۆ جەلتوقسان ايىنىڭ اياعىنا جوسپارلانعان ماسكەۋ قالاسىندا وتكىزىلۋى مۇمكىن ەۋرازيالىق ەكونوميكالىق وداق جەتەكشىلەرىنىڭ كەزدەسۋى تۋراسىندا دا ءسوز قوزعادى.
ۆلاديمير پۋتين مەن نۇرسۇلتان نازاربايەۆتىڭ تەلەفون ارقىلى تىلدەسۋى تۋرالى رەسەيلىك لەنتا. رۋ دا جازدى.
LENTA. RU:
وللاندتىڭ قازاقستانداعى ءىسساپارى اياقتالىسىمەن، نۇرسۇلتان نازاربايەۆ رەسەي پرەزيدەنتى ۆلاديمير پۋتينمەن تەلەفون ارقىلى ۇزاق سويلەستى. مەملەكەت باسشىسىنىڭ باسپا ءسوز قىزمەتىنىڭ مالىمەتىنشە، قوس پرەزيدەنت ۋكرايناداعى جاعدايعا بايلانىستى پىكىر الماسىپ، قالىپتاسقان ماسەلەنى شەشۋ تۋراسىندا اڭگىمەلەسكەن.
ال رەيتەرس اگەنتتىگى ايتۋلى كەزدەسۋدەن كەيىنگى جاعدايدى ساراپتاي كەلە، نۇرسۇلتان نازاربايەۆتىڭ ەكى جاقتى سانكسيالارعا شەكتەۋ قويىپ، مامىلەگە كەلۋ تۋرالى ۇسىنىسى تىعىرىقتان شىعۋدىڭ جالعىز جولى ەكەندىگىن جازعان.
نۇرسۇلتان نازاربايەۆ، قازاقستان رەسپۋبليكاسىنىڭ پرەزيدەنتى:
ۋكرايناداعى جاعداي ءبارىمىزدى الاڭداتادى. قاقتىعىستار ورىن العانى ورىنسىز. الايدا ءبىز احۋالدى قولعا الىپ، ماسەلەنى شەشۋ جولدارىن ىزدەپ جاتىرمىز. قىرعي- قاباق سوعىس پەن مايدانداسۋعا جول بەرمەۋىمىز كەرەك دەپ ەسەپتەيمىن.
ساراپشىلار فرانسيا پرەزيدەنتىنىڭ ەلدەگى بەدەلى ءتۇسىپ بارا جاتقاندىعىن كوپ ايتقان- دى. الايدا ەندى فرانسۋا وللاندتىڭ باتىس پەن رەسەيدى جاقىنداستىرۋداعى قادامى، ۋكراينا ماسەلەسىن ىلگەرىلەتۋى، ونىڭ ساياساتتاعى ءرولىن ۇستەمدەتە تۇسەتىنى انىق. بۇل - مەدالدىڭ ءبىر جاعى. ال ەكىنشى جاعىنان، الەم 2015 - جىلى گەوساياسي الاڭدا ايقىن دا انىق ساياساتىن ۇيلەستىرگەن «جاڭا ويىنشى» پايدا بولۋىن كۇتۋدە. اڭگىمە ەۋرازيالىق ەكونوميكالىق وداق تۋراسىندا.
جۇراعات بامان
«استانا» ارناسى
