اسكەري جارامدىلىققا ەندى ادامي فاكتور ەمەس كومپيۋتەرلىك تەست تورەلىك ەتەدى

الماتى. قازاقپارات - بيىل اسكەر قاتارىنا شاقىرىلعانداردىڭ جۇيكە-پسيحيكالىق تۇرعىدان اسكەرگە جارامدى-جارامسىزدىعى تۇڭعىش رەت كومپيۋتەرلىك تەست ارقىلى انىقتالادى.

بۇل تۋرالى بۇگىن الماتى قالالىق اسكەرگە شاقىرىلعاندار جينالاتىن پۋنكتتە وتكەن باسپا ءسوز ءماسليحاتىندا الماتى قالالىق قورعانىس ىستەرى جونىندەگى دەپارتامەنت باستىعىنىڭ ورىنباسارى، پودپولكوۆنيك ومار ايتقازين ءمالىم ەتتى.

ونىڭ ايتۋىنشا، ەندى جاستاردى اسكەر قاتارىنا قابىلداۋ كەزىندە ولاردىڭ جارامدى-جارامسىزدىعىنا ادامي فاكتور اسەر ەتە المايدى.

«تۇڭعىش رەت «اقسۇڭقار» دەپ اتالاتىن پسيحودياگنوستيكالىق كەشەن ساتىپ الىندى. ەڭ باستىسى، اسكەرگە شاقىرىلعاداردى تەكسەرۋدە ادامي فاكتور الىنىپ تاستالىندى. ويتكەنى، پسيحولوگتار اسكەرگە شاقىرىلعاندارمەن اڭگىمە جۇرگىزۋ بارىسىندا ءار ءتۇرلى كەدەرگىلەرگە ۇشىراۋى مۇمكىن، ءتىپتى قورقىپ قالۋلارى دا عاجاپ ەمەس. سوندىقتان، بيىل كۇزگى شاقىرىلىم ناۋقانىندا وسىنداي كومپيۋتەرلىك تەستىلەردى قولدانىپ جاتىرمىز. جاستاردىڭ پسيحولوگيالىق احۋالىن تولىعىمەن كومپيۋتەر انىقتايتىن بولادى»، - دەدى و. ايتقازين.

«اقسۇڭقار» دەپ اتالاتىن پسيحودياگنوستيكالىق كەشەندى قازاقستاندىق ماماندار رەسەيلىك ماماندارمەن بىرلەسە جاساعان.

«جاڭا تەست بيىل كۇزگى شاقىرىلىم بارىسىندا تۇڭعىش رەت قولعا الىندى. ول 44 ادىستەمەدەن تۇرادى. ءبىز ناقتى ەكى ادىستەمە بويىنشا جۇمىس ىستەيمىز. ولار «بولجام 2» جانە «بەيىمدىلىك» دەپ اتالادى. ولار اسكەر قاتارىنا شاقىرىلعانداردىڭ جۇيكە-پسيحولوگيالىق ۇستامدىلىعىن، اسكەرگە دايىندىعىن انىقتاۋعا باعىتتالعان.

مىسالى، «بولجام 2» ادىستەمەسى 86 سۇراقتان، ال «بەيىمدىلىك» ساۋالناماسى 165 سۇراقتان تۇرادى. وندا اسكەرگە شاقىرىلعان ازاماتتىڭ جۇيكە جۇيەسى، پسيحيكالىق احۋالى مەن مورالدىق كۇيى، كوممۋنيكاتيۆتىك قابىلەتى مەن تۇلعالىق بەيىمدەلۋ الەۋەتى انىقتالادى.

ءبىرىنشى تەستى تولتىرۋعا 20 مينۋت، ال ەكىنشى تەستىڭ سۇراقتارىنا جاۋاپ بەرۋگە 40 مينۋت ۋاقىت بەرىلەدى. تەستەردىڭ قورىتىندىسىن تولىعىمەن كومپيۋتەر وڭدەپ، قاعاز بەتىنە شىعارادى. ول تەك قولباسشىلىق قۇرامعا عانا ارنالعان. جانە قۇپيا قۇجات بولىپ ەسەپتەلەدى. اسكەرگە شاقىرىلعانداردىڭ قولىنا بەرىلمەيدى»، - دەدى ءوز سوزىندە الماتى قالاسى قورعانىس ىستەرى جونىندەگى دەپارتامەنتتىڭ پسيحولوگى، كاپيتان زۋحرا كوبەكوۆا.

ايتا كەتەلىك، بۇل قۇجات كومانديرلەر ءۇشىن تەك ۇسىنىس رەتىندە. سوڭعى شەشىمدى قولباسشىلىق شىعارادى.

«ءبىز تەست ناتيجەسى قولىمىزعا تيگەن سوڭ، ونى زەرتتەيمىز. اسكەرگە شاقىرىلعان ءاربىر ازاماتپەن جەكە- جەكە اڭگىمە وتكىزەمىز. ماسەلەنىڭ انىق-قانىعىنا كوز جەتكىزۋگە تىرىسامىز. بۇل جەردە كومپيۋتەرلىك تەست تەك ۇسىنىستىق سيپاتقا يە. ويتكەنى، قانشا جەردەن مىقتى بولعانىمەن كومپيۋتەر ادامنىڭ ىشكى-دۇنيەسىنە، تابيعاتىن تولىق مىنەزدەمە بەرە المايدى. سوندىقتان، پسيحولوگيالىق جاعىنان جارامسىز دەپ تابىلعان ازاماتتى اسكەرگە الۋ- الماۋ كومانديرلەردىڭ جاۋاپكەرشىلىگىندە. دەگەنمەن، تەست ناتيجەسى - ءبىز ءۇشىن بازالىق شەشىم. سوندىقتان، اسكەرگە شاقىرىلعان ازاماتتىڭ نە ءۇشىن اسكەرگە بارۋىنا بومايتىندىعى وعان بايىپپەن تۇسىندىرىلەدى. بىزدە تەست ارقىلى اسكەر قاتارىنان قالىپ قويعاندار كوپ ەمەس. مىسالى، بيىل كوكتەمگى شاقىرىلىم كەزىندە 7 جىگىت جۇيكە- پسيحولوگيالىق احۋالى بويىنشا اسكەرگە جارامسىز بولىپ شىقتى»، - دەدى و. ايتقازين.

ايتا كەتەلىك، بۇعان دەيىن پسيحولگيالىق تەست تەك قاعاز جۇزىندە جۇرگىزىلىپ كەلگەن.

اۆتور: جاپپاربەرگەن ايبوتا