قولجەتىمدى باسپاناعا قاتىستى جاڭا باعدارلاما جىل سوڭىنا دەيىن قابىلدانادى
بۇل تۋرالى بۇگىن سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىنان كەيىن جۋرناليستەرگە بەرگەن سۇحباتىندا ۇلتتىق ەكونوميكا ءمينيسترىنىڭ ورىنباسارى قايىربەك وسكەنبايەۆ ءمالىم ەتتى.
ەسكە سالايىق، كوميتەت وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان بولاتىن.
«قازىرگى كۇنى ۇكىمەتتە ەلباسى تاپسىرعان باعدارلاما قارالىپ جاتىر. ونداعى ماسەلەلەردىڭ بارلىعى ماقۇلدانعاننان كەيىن، رەسمي تۇردە حابارلاناتىن بولادى. باعدارلاما جىل سوڭىنا دەيىن قابىلدانادى»، - دەدى مينيستر ورىنباسارى.
ەسكە سالايىق، پرەزيدەنت نۇرسۇلتان نازاربايەۆ «نۇرلى جول - بولاشاققا باستار جول» اتتى جولداۋىندا تۇرعىن ءۇي ينفراقۇرىلىمىن نىعايتۋ ماسەلەسىنە توقتالىپ، باسپانا قۇرىلىسى باعدارلاماسىن قايتا قاراۋدى تاپسىرعان بولاتىن.
«بىزدە قولجەتىمدى باسپانا بويىنشا كوپتەگەن ادىستەر بار. ەلىمىزدە تۇرعىن ءۇي قۇرىلىس جيناق، يپوتەكا، ارەندالىق باعىتتار قامتىلعان. ەندى بىزگە باسقا قىرىنان قاراۋ كەرەك. مەملەكەت الەۋمەتتىك ارەندالىق باسپانانى سالىپ، ونى حالىققا ساتىپ الۋ قۇقىعىمەن ۇزاق مەرزىمگە جالعا بەرەتىن بولادى. قازىرگى كەزدە قولدانىستاعى جۇيە قوماقتى قارجىنى تالاپ ەتەدى. باستاپقى جارنانى تولەتكىزەدى، سودان كەيىن بانكتەر كابالدى (كىرىپتارلىق) پايىزداردى بەكىتەدى، ياعني ونىڭ دەڭگەيى 20 پايىزعا جەتەدى. ادامدار ونى تولەۋگە قاۋقارسىز جانە پروبلەمالار تۋىندايدى. بۇل باعدارلامالار قالادى، ولار داۋلەتتى ادامدار ءۇشىن قالىپتى. ال جاڭا باعىتتاعى باعدارلامانى جاس وتباسىلار ءۇشىن جانە باسپاناعا ءزارۋ ازاماتتارعا جاساپ جاتىرمىز»، - دەدى ەلباسى.
پرەزيدەنتتىڭ سوزىنە قاراعاندا، جاڭا باعدارلاما بويىنشا باسپانا ەش دەلدالدارسىز، بارىنشا تومەن پايىزبەن بەرىلەدى. نەسيەلىك قىزمەت ەتۋ 1-2 پايىز كولەمىندە بولۋى مۇمكىن. وسى باعدارلاما اياسىندا تۇرعىن ءۇيدى ساتىپ الۋ قۇنى تومەندەتىلەدى، باستاپقى جارنا تولەنبەيدى.
اۆتور: قانات مامەتقازى ۇلى
