الماتىدا جاڭا «ۇلت مۇراتى» گازەتى جارىق كوردى
«ەل مۇراتى - ۇلت مۇراتىنان باستاۋ الادى. ءبىزدىڭ ماقساتىمىز - ۇلت مۇددەسىنە قاتىستى ماسەلەلەردى باسىلىم بەتىندە كوتەرىپ، اتقارۋشى بيلىك پەن حالىق اراسىندا التىن كوپىر ورناتۋ.
اسىرەسە، سىرت ەلدەردەن كەلگەن جانە ازىرگە دەيىن وزگە ەلدەردە ءومىر ءسۇرىپ جاتقان اعايىن قانداستارعا قاجەتتى اقپاراتتار، تۇيتكىلدى ماسەلەلەر باسىلىم بەتىندە جارىق كورىپ وتىرادى. ۇلت مۇراتىنىڭ ۇلكەن جۇك ەكەنىن مەن جاقسى تۇسىنەمىن. وسى مۇراتتىڭ ۇدەسىنەن شىعۋ ءۇشىن، بار كۇش- قۋاتىمدى. سانا- سەزىمىمدى، جۇرەگىمدەگى وتان دەپ سوققان ىستىق جىگەرىمدى سارقا جۇمساۋعا دايىنمىن. جالپى، جاقسى ادام بولۋ، جاقسى مامان بولۋ، وتانعا قىزمەت ەتۋدىڭ بارلىعى سايىپ كەلگەندە ۇلت مۇراتى سەكىلدى. ونىڭ ۇستىنە مەنىڭ العا قويعان ماقساتتارىمنىڭ «قازاقستان-2050» ستراتەگياسىمەن ۇندەسىپ جاتقاندىعى قايراتىما قايرات، جىگەرىمە جىگەر قوسادى» ، - دەدى «ۇلت مۇراتى» قوعامدىق بىرلەستىگىنىڭ پرەزيدەنتى، اتتاس باسىلىمنىڭ باس رەداكتورى قۇتماعامبەت قونىسباي.
سونىمەن قاتار، گازەتتىڭ باس رەداكتورىنىڭ ايتۋىنشا، ەندى اپتاسىنا ءبىر رەت شىعىپ تۇراتىن 12 بەتتىك ۇلكەن فورماتتى جاڭا باسىلىم - ۇلتتىق قۇندىلىقتاردى، ۇلتتىق بىرلىكتى، قازاقي بولمىستى، ءداستۇردى ناسيحاتتايتىن تاريحي- تانىمدىق، قوعامدىق- ساياسي گازەت بولماق.
«جاحاندانۋ زامانىندا قازاقتىڭ ۇلت رەتىندە ساقتالىپ قالۋىنا، ۇتىلماۋىنا، ۇلتتىق داستۇرلەرىنىڭ ساقتالۋىنا بارىنشا كۇش سالامىز. ويتكەنى، كونە تاريحى مىڭداعان جىلعا سوزىلاتىن بۇگىنگى قازاق حالقى ءوزىنىڭ مىقتى سالت- داستۇرلەرىنىڭ، ءتىلىنىڭ، ۇلتتىق دۇنيەتانىمىنىڭ ارقاسىندا ءوزىنىڭ ۇلتتىق ءبىتىم- بولمىسىن ساقتاپ قالدى. سوندىقتان، گازەتتىڭ باستى ۇرانى: «سەنىم، ءداستۇر، اشىقتىق جانە توزىمدىلىك» دەپ اتالادى» - دەدى ق. قونىسباي.
ايتا كەتەلىك، گازەت باستاپقىدا 5000 دانامەن تارالادى دەپ كۇتىلۋدە. العاشقى سانى ق ر تۇڭعىش پرەزيدەنتى كۇنىنە وراي، وتكەن 1 - جەلتوقسان كۇنى جارىق كوردى.
اۆتور: جاپپاربەرگەن ايبوتا
