گەرمانيادا قازاقستاننىڭ تاۋەلسىزدىك كۇنى اتالىپ ءوتتى
«قازاقستاندىقتاردى ۇلتتىق مەيراممەن قۇتتىقتاۋعا 1000 نان اسا قوناق، ونىڭ ىشىندە: گ ف ر- دىڭ كورنەكتى قوعامدىق جانە ساياسي قايراتكەرلەرى، بۋندەستاگ، لاندتاگ دەپۋتاتتارى، مينيسترلىكتەر مەن ۆەدومستۆولاردىڭ باسشىلارى، مادەنيەت قايراتكەرلەرى، ديپلوماتيالىق كورپۋس، ب ا ق، قازاق دياسپوراسى، ستۋدەنتتەر، سونىمەن قاتار گەرمانيانىڭ ىسكەر توپتارىنىڭ وكىلدەرى كەلدى»، - دەلىنگەن حابارلامادا.
ق ر گ ف ر-داعى ەلشىسى بولات ءنۇسىپوۆ ءوز سوزىندە قازاقستان پرەزيدەنتى نۇرسۇلتان نازاربايەۆتىڭ باسشىلىعىمەن ەلىمىزدە اتقارىلىپ جاتقان نەگىزگى جەتىستىكتەر مەن تابىستارعا توقتالدى. قازاقستاندىق ديپلومات اۋديتورياعا ەلباسىنىڭ «نۇرلى جول - بولاشاققا باستار جول» جاڭا ەكونوميكالىق ساياساتىنىڭ ماقسات-مىندەتتەرىمەن ەگجەي-تەگجەي تانىستىرىپ، وسى قۇجات نەگىزىندە الەۋەتتى ىنتىماقتاستىقتىڭ باسىم باعىتتارىن بەلگىلەدى.
ەلشى ەلباسىنىڭ 2012-جىلى اقپان ايىندا بەرليندە گ ف ر فەدەرالدىق كانتسلەرى انگەلا مەركەلمەن جۇرگىزگەن كەلىسسوز ناتيجەسىندە قول جەتكىزگەن شيكىزات، تەحنولوگيالىق، ونەركاسىپتىك سالالاردا ەكىجاقتى كەلىسىمنىڭ جۇزەگە اسۋى تۋرالى ارىپتەستىكتە، ق ر-دا نەمىس تاجىريبەسىنىڭ دۋالدى ءبىلىم جۇيەسىن ەنگىزۋگە، سونىمەن قاتار تاعى باسقا دا كەلىسىمدەردىڭ ورىندالۋىنا بەلسەندى جانە ءوزارا ءتيىمدى ىنتىماقتاستىقتى دامىتىپ وتىرعان گەرمانيا وكىلدەرىنە ريزاشىلىعىن ءبىلدىردى. ەكىجاقتى قاتىناستىڭ بارلىق كەشەنىنە جاقىن ارادا گ ف ر-دىڭ سىرتقى ىستەر ءمينيسترى ف. -ۆ. شتاينمايەردىڭ استاناعا ساپارىنىڭ يگى اسەرى بولعانى ەسكەرىلدى.
كەش بارىسىندا گەرماندىق ارىپتەستەر ەكى ەل اراسىنداعى ساياسي جانە ەكونوميكالىق ىنتىماقتاستىعىنىڭ جوعارى الەۋەتىن اتاپ ءوتىپ، قازاقستان حالقىنا الداعى ۋاقىتتا تۇراقتىلىق جانە وركەندەۋ تىلەدى. جينالعان قوناقتار ءبىزدىڭ ەلىمىزدىڭ حالىقارالىق ارەنادا بەدەلىنىڭ، قازاقستاننىڭ الەۋمەتتىك-ەكونوميكالىق دامۋىنىڭ قارقىنى ارتىپ كەلە جاتقانىن، سونىمەن قاتار «G-Global» جانە «اتوم» سەكىلدى قازاقستان ۇسىنعان ءىرى سىرتقى ساياسي باستامالاردىڭ وزەكتىلىگىن جانە تاجىريبەلىك باعىتىن اتاپ ءوتتى.
سالتاناتتى كەشكە قازاقستاندىق ساحنانىڭ جۇلدىزدارى قىدىرالى بولمانوۆ پەن قاراقات ءابىلدينا ۇلتتىق ناقىش سومداپ، ءداستۇرلى جانە زاماناۋي مۋزىكالىق مادەنيەتتىڭ جاۋھارلارىن ورىندادى.
