ەندى وليمپيادانى بىرنەشە ەلدە ءبىر مەزگىلدە وتكىزۋگە بولادى
ەندى وزدەرىندە جازعى جانە قىسقى ويىندار وتكىزۋ ءۇشىن تىلەك بىلدىرۋشىلەرگە بۇل جەڭىل عانا ەمەس، ارزانعا دا تۇسپەك.
سونىمەن قاتار، تاريحتا العاش رەت جارىستاردى ءبىر مەزگىلدە بىرنەشە قالالاردا جانە ەلدەردە وتكىزۋ مۇمكىندىگىنە جول بەرىلەدى.
ح و ك-تىڭ موناكودا وتكەن 127- سەسسياسىندا ۇيىم مۇشەلەرى «وليمپيادالىق كۇن ءتارتىبى-2020» رەفورمالارى جوسپارىن قابىلداپ، ويىنداردى وتكىزۋگە ءوتىنىم بەرۋ ەرەجەلەرىن قايتا قاراۋعا داۋىس بەردى.
جوسپاردا سونىمەن قاتار ح و ك-ءتىڭ ءوز وليمپيادالىق تەلەارناسىن قۇرۋ كوزدەلۋدە.
كوپتەگەن ەلدەردى ويىنداردى وتكىزۋدىڭ جوعارى باعاسى ۇركىتىپ وتىر. بۇل اسىرەسە، سوچيدەگى قىسقى وليمپيادا وتكىزىلگەننەن كەيىن وزەكتى بولا ءتۇستى، بۇل ويىن ۇيىمداستىرۋشىلارعا 50 ميلليارد دوللاردان استام شىعىنعا تۇسكەن.
2022-جىلعى قىسقى ويىندار وتكىزۋدەن التى قالانىڭ تورتەۋى باس تارتىپ، وتىنىمدەرىن قايتارىپ الدى. وليمپيادالىق دودادان ءوز باستاماسىمەن وسلو، لۆوۆ، كراكوۆ جانە ستوكگولم شىعىپ قالدى. ەندى 2022-جىلعى ويىنداردى وتكىزۋ ءۇشىن الماتى مەن بەيجىڭ عانا باسەكەگە تۇسەدى.
ح و ك جارىستاردى وتكىزۋدە قارجىنى ۇنەمدەۋ ءۇشىن قازىرگى قولدا بار سپورت عيماراتتارىن بەلسەندى پايدالانۋعا شاقىرۋدا.
سونداي-اق ح و ك جازعى جانە قىسقى وليمپيادالارداعى سپورت تۇرلەرىن كوبەيتۋگە شەشىم قابىلدادى، الايدا جارىسقا 10,5 مىڭ اتلەتتى قاتىستىرۋعا ليميت ەنگىزدى. ماسەلەن، لوندونداعى ويىنداردا وسىنشا سپورتشى بولعان.
وليمپيادا-2012 مەدالدارى 26 سپورت ءتۇرلى بويىنشا تاپسىرىلدى، جاڭا ەرەجە ولاردىڭ سانىن 28 گە دەيىن كوبەيتىپ وتىر. بۇل 2020-جىلعى توكيودا وتەتىن ويىندار باعدارلاماسىنا بەيسبول مەن سوفتبولدى ەنگىزۋگە مۇمكىندىك بەرەدى.
