ءبىر قايىرىم. بالعىنبەك پەن مەيىربەك ايتىسقاندا نەمەسە ءازىلشىل بالعىنبەكتىڭ قايعىسى
ءبىر كەزەگىندە مەيىربەك:
قىزىنادى دەمەي مە ەر ەڭبەكتە،
قىزمەتىمدى ەتەيىن جەدەل كوپكە.
ۋا باكە وزىڭىزدەي بۇل كۇندەرى،
قازاق ءۇشىن ۋايىم جەگەن كوپ پە؟
ەگىلىپ ەلدىڭ مۇڭىن ءسىز ايتقاندا،
ەكى-اق ەلى جەتپەۋشى ەد توبەم كوككە.
ءبىراق تا بۇل كۇندەرى ساحناعا،
شىعىپ جۇرگەن جاندايسىز تەك ەرمەككە.
ايتىسقا شىققان سايىن ءان سالاسىز،
شابىتىڭ شالدىقتى ەكەن نەدەن دەرتكە.
«و قالا...»، «مەيلى...» دەپ سالىپ جۇرگەن،
اندەرىڭ كورەرمەن كەنەلمەك پە.
تاعى قانداي حيت انگە سالادى دەپ،
ءسىز شىققاندا ەل وتىراد ەلەڭدەپ تە.
«ماريا ماگدالەنا»، «چيپ-چيپ» دەگەن،
وسكەمەندە ايتىپسىز ولەڭ كوپكە.
قىرعىزدى شوق قىزدارمەن شۋلاتىپ ەڭ،
ءبىراق ول ءىس بولمادى كەلەر رەتكە.
مەن سىزگە ءان ايتپا دەپ تۇرعانىم جوق،
اندەر بار عوي قۇرىلعان مول ورنەككە.
ءشامشى مەن نۇرعيسادان شىرقاساڭشى،
ءان ايتقىڭ كەپ باراتسا ەگەر كوپكە.
«ءاننىڭ دە ەستىسى بار، ەسەرى بار»،
ابايدىڭ ايتقان ءسوزىن تەرەڭ زەرتتە.
ءان-جىرىن باسقالاردىڭ نە قىلاسىڭ،
قالجىڭىڭ تۇرعان كەزدە بەرەر كوپكە.
كەشەگى كەنەندەردەن كەلىپ جەتكەن،
ايتىستىڭ ءوز ماقامى كونەرمەك پە؟
اعاسى سىزگە ايتاتىن ءوتىنىشىم،
جاعدايدى بۇدان بەتەر تەرەڭدەتپە.
التىنمەنەن اپتالعان دومبىرامەن،
ارزانداۋ دۇنيەلەردى ولەڭدەتپە.
قازاقتىڭ قاسيەتتى ءتول ونەرىن،
« قىزىل ورىك»، «شوق قىزبەن» تومەندەتپە. - دەپ قايىرعاندا زال دۇركىرەتە قول سوقتى. ەندى بالعىنبەكتەن جاۋاپ كۇتتى. بالعىنبەك بايىپپەن بىلايشا جاۋاپ قايىردى:
مەيىربەك، ولىمنەن دە ۇيات ۇلى،
مەنمەندىككە باستايدى ريا ءتۇبى.
جەتى تومدىق كىتاپتى وقىساڭشى،
ايتىسقا شىعاسىڭ عوي جيى اقىرى.
ايتىستا قانداي جامان ىنىلەردىڭ،
اعاسىن قياناتقا قياتىنى.
ساباس اقىن قۇلاق بۇراپ مۇرتىن قاققان،
بۇل دا شوۋدىڭ اقىلعا سىياتىنى.
شاشۋباي قۇيرىعىمەن جورعالاسا،
ايتىستا الشى تۇسكەن ءجيى اسىعى.
كەنەننىڭ «وي جايلاۋ» مەن «كوك شولاعى»،
ايتىستاعى اندەردىڭ قيا شىڭى.
ايتىستا ءان ايتۋدى دوپينك دەگەن،
مەيىربەكتىڭ بار ما ەكەن، مي، اقىلى.
اۋەزوۆ مۇحتار اعام ايتىپ كەتكەن،
بۇل ايتىس قازاعىمنىڭ تەاترى!
مەن سەنى ءبىرى دەۋشى ەم، يماندى ۇلدىڭ،
بەتىمنەن تىلگەنىن-اي ديدارلىمنىڭ.
ءبىراق ساعان ءتىسىمدى باتىرمايمىن،
ءتىلىمدى زيا سوزدەن تيعان قۇلمىن.
قۇر ءاندى اۋەس قىلعان جان ەمەسپىن،
قۇرانعا ۋاقىتىمدى قيعان قۇلمىن.
ايتىستا ءانىمدى ساپ، جانىمدى ساپ،
كورەرمەنگە كوپ قىزىق سىيلاپ ءجۇرمىن.
ورىس ءتىلدى قازاققا ورىسشا ايتىپ،
انا ءتىلىن سىيلاۋعا يلاندىردىم.
سەگىز ءتۇرلى ونەرىم بولماسا دا،
ساحنادا جانىمدى جەپ قيناپ ءجۇرمىن.
ءان تۇگىل ءجۇرسىن قۇساپ جانىمدى ساپ،
ايتىسقا اۋديتوريا جيناپ ءجۇرمىن. - دەگەندە باكەڭنىڭ ۋاجىنە يلانعان جۇرت تاعى دا شۋلاپ قويابەردى. بالعىنبەك مۇنىمەن توقتاعان جوق، ارى قاراي جالعادى. اۋىر بولدى:
كىسىنىڭ كەلتىرگەنمەن كۇلكى رەڭىن،
قايعى، مۇڭ قاشىرماي ما سۇرقىن ونىڭ.
ەندەشە، بالعىنبەكتىڭ ءازىل ەمەس،
قايعىسىنا قۇلاعىن ءتۇرسىن ەلىم.
ازعىندىق، الاۋىزدىق، ارسىزدىقتىڭ،
قايسىسىنان باستاسام دا ىركىلەمىن.
قىتاي، كارىس، ۇندىگە ءتيىپ جاتقان،
قىزدارىڭ بۇزعان جوق پا ۇلت رەڭىن.
قىزىنا قىرىق ۇيدەن تيىم قويعان،
قالايشا ۇمىت بولدى عۇرپىڭ ەلىم.
شىمىلدىققا جاسىرىپ سۇلۋلارىن،
تەگىن تازا ساقتاعان تۇركىم ەدىڭ.
جالعىز قىزدىڭ ارى ءۇشىن ازاماتى،
جاۋ جاپىرىپ كىرەتىن جۇرتىم ەدىڭ
ال بۇگىن ازاماتتىڭ ءوزى دە ايەل،
قاس جۇلىنىپ، بويالدى كىرپىك، ەرىن.
قايران، ەلىم قازاعىم بۇل زاماندا،
باسىڭا ءۇيىرىلدى بۇلتى نەنىڭ؟
جاتقا كەتكەن قىزىنىڭ جاتىرىندا،
جاۋلار ءوسىپ جاتقانىن ءبىلسىن ەلىم
قارا قاسقا قىتايعا قاتىن بولعان،
قارىنداستى كورگەندە كۇرسىنەمىن.
مىڭ- ميلليون قۇمىرىسقا قۇرساعىنا،
يلەۋ سالىپ جاتقانداي تۇرشىگەمىن. - دەگەندە قانى قازاقتىڭ كوكىرەگىن سىزداتىپ تۇرعان وسى ءبىر بىتەۋجاراعا قانجار قاداپ العانداي بولدى. ءبارىمىزدىڭ جۇرەگىمىز ءتىز ەتىپ، كەڭسىرىگىمىز اشىدى، كوزگە ءمولت ەتىپ جاس كەلدى. بالعىنبەكتىڭ كورەرمەنى كۇلىپ وتىرىپ جىلادى.
ايتپاعىم، ازان شاقىرىپ ات قويىپ، اق بەسىكتە تەربەتىپ قىزعالداقتاي قۇلرىپتىپ وسىرگەن قىزدارىمىزدىڭ ورىس، قىتايعا تيگەنىنە ءار قايسىمىز بالعىنبەكتەي تۇرشىكسەك قانا وسى ءبىر اۋىر دەرتتەن ارىلۋعا مۇمكىندىك بولماق. ايتپەسە، جاۋىمىزدى قارىنداستارىمىزدىڭ جاتىرىڭدا ءوسىرىپ، جاۋتاڭداپ قالار كۇن الىس ەمەس ازاماتتار! قۇداي ساقتاسىن!
ۇلاربەك نۇرعالىم ۇلى، kazaitys.kz
