مەملەكەت باسشىسى ۇلتتىق يننوۆاتسيالىق جۇيە قۇرۋدى ۇسىندى

الماتى. قازاقپارات - ق ر مەملەكەت باسشىسى نۇرسۇلتان نازاربايەۆ بۇگىن الماتىدا وتكەن يننوۆاتسيالىق فورۋم بارىسىندا ۇلتتىق يننوۆاتسيالىق جۇيە قۇرۋدى ۇسىندى.

«يننوۆاتسيا كەز كەلگەن ەكونوميكا، كەز كەلگەن كاسىپورىن باسەكەلەستىگىنىڭ نەگىزى. بارلىق كاسىپورىندار بىلىمگە نەگىزدەلىپ جۇمىس جاساۋى كەرەك. ءبىز وندىرىستەن قالعان قارجىنىڭ 1 پايىزىن عىلىمي-زەرتتەۋ تاجىريبەلىك كونستۋركسيالىق قۇرىلىمداردى جاساۋعا جۇمساپ جاتىرمىز. قازىر بۇل ءوزىن ءوزى اقتاۋدا. ءبىز ۇلتتىق يننوۆاتسيالىق جۇيەنى قۇراتىن بولامىز. جۇيە نەگىزگى ءۇش باعىتتان: مەملەكەت، عىلىم، بيزنەستەن تۇرادى»، - دەدى ەلباسى.

سونىمەن قاتار، پرەزيدەنت يننوۆاتسيالىق دامۋعا بايلانىستى بايقاۋلار ۇيىمداستىرىپ تۇرۋدى ۇسىندى.

ونىڭ ويىنشا، مۇنداي قادام حالىقارالىق ارەنادا باسەكەلەستىكتى ارتتىرۋعا كومەكتەسەدى.

«بۇل بىزگە دامىعان 30 ەلدىڭ قاتارىنا ەنۋ ءۇشىن وتە قاجەت. قازىر ءبىز د س ۇ-عا كىرۋگە دايىندالىپ، ەكونوميكالىق ىنتىماقتاستىق جانە دامۋ ۇيىمىمەن جۇمىس جاساپ جاتىرمىز. بۇل ۇيىم ەۋرازيالىق ەكونوميكالىق وداقپەن سەرىكتەس بولاتىنىنا سەنىمدىمىن. ياعني، حالىقارالىق نارىققا شىققان سايىن باسەكەلەستىك ارتا تۇسەدى. ارتتا قالىپ قويماس ءۇشىن يننوۆاتسيالىق دامۋدى قالاي ىنتالاندىرۋ كەرەكتىگىن ويلاستىرۋ كەرەك. مۇمكىن، ارنايى بايقاۋ ۇيىمداستىرىپ، كەزەڭارالىق ناتيجەلەرىن جاريالاپ وتىرعان دۇرىس شىعار. بۇل بيزنەسكە ۇلكەن سەرپىن بەرەر ەدى»، - دەدى مەملەكەت باسشىسى.

 

اۆتور: گۇلميرا عوسمانالي