كوپتەگەن كومپانيالار عىلىمعا قارجى سالۋدى بوس اۋرەشىلىك دەپ سانايدى - ن. نازاربايەۆ

الماتى. قازاقپارات - الماتىدا ءوتىپ جاتقان يننوۆاتسيالىق فورۋم بارىسىندا مەملەكەت باسشىسى بيزنەستىڭ يننوۆاتسيالىق دامۋعا قارجى سالۋعا ءالى دە قۇلىقسىز ەكەندىگىن جەتكىزدى.

«ءوندىرىستى قارجىلاندىرۋ ءجۇرىپ جاتىر، الايدا بۇل ماسەلەدە حالىق اراسىندا ساۋاتتىلىق جەتىسپەي جاتاتىنى وكىنىشتى. كاسىپورىن دامىپ كەلە جاتادى دا، تىعىرىققا تىرەلەدى. ءسويتىپ، باسەكەلەستىكتى، نارىقتى جوعالتادى. وسى كەزدە عىلىم ىسكە قوسىلىپ، سەرپىن بەرۋى قاجەت. ءبىزدىڭ كومپانيالاردىڭ كوبى عىلىمعا قارجى سالۋ بوس اۋرەشىلىك دەپ سانايدى. كاسىپورىندار دا ازىرگە يننوۆاتسياعا بەيىمدەلە الماي وتىر»، - دەدى ن. نازاربايەۆ.

ەلباسى يننوۆاتسيالىق دامۋدا سۇرانىس مەملەكەت تاراپىنان ەمەس، نەگىزىنەن بيزنەس تاراپىنان بولۋ كەرەكتىگىن ەسكەرتتى.

«مەملەكەت دامۋعا جان جاقتى سەرپىن بەرىپ جاتىر. الايدا، يننوۆاتسيالىق دامۋدا سۇرانىس مەملەكەت تاراپىنان ەمەس نەگىزىنەن بيزنەس تاراپىنان بولۋ كەرەك. ءىس جۇزىندە قالاي جۇمىس جاساۋدى «قازاق مىس» كورپوراتسياسى كورسەتتى. ءبىز سياقتى شيكىزات ءوندىرۋشى ەل ءۇشىن شيكىزات كەشەنىن وڭدەۋ ۇلكەن مانگە يە. بۇل تەحنولوگيالاردا ەڭ الدىمەن جەكە كاسىپورىندار مۇددەلى بولۋى كەرەك»، - دەدى ەلباسى.

مەملەكەت باسشىسى قازاقستانداعى كاسىپكەرلىكتىڭ يننوۆاتسيالىق الەۋەتىن ەكشەۋگە ۇلتتىق كاسىپكەرلەر پالاتاسى دەن قويۋى كەرەكتىگىن دە اتاپ ءوتتى.

«مەنىڭ ويىمشا، ش و ب پەن ءىرى كاسىپكەرلەرگە جەكە كاسىپكەرلەرگە، يننوۆاتسيالىق باعىتقا دەن قوياتىن ۋاقىت كەلدى. مەملەكەت ولاردىڭ جەمىستى جۇمىس جاساۋىنا جاعداي جاساپ كەلەدى. اسىرەسە، بيولوگيا، مەديتسينا سالالارى ءتۇرلى عىلىمي جەتىستىكتەردى تالاپ ەتەدى»، - دەپ قورىتىندىلادى ن. ءا. نازاربايەۆ.

اۆتور: گۇلميرا عوسمانالي