كولىك جۇرگىزۋدەگى ابايسىزدىقتىڭ نەگىزگى سەبەپتەرى انىقتالدى
ساۋالناماعا 18-72 جاس ارالىعىنداعى 1,5 مىڭعا جۋىق ادام قاتىستى.
ولارعا مىناداي سۇراقتار قويىلدى: ءسىزدى قوزعالىس كەزىندە نە الاڭداتادى؟
ءسىز كولىك ايداۋ كەزىندە اينالاڭىزعا ءجيى قارايسىز با؟
ساۋالناما ناتيجەسى بويىنشا تەلەفونمەن سويلەسۋ جۇرگىزۋشىلەردى ەڭ كوپ الاڭداتاتىن سەبەپ بولىپ شىقتى، بۇل جاۋاپتى قاتىسۋشىلاردىڭ 18 پايىزى تاڭداعان. ولاردىڭ سەگىز پايىزى ءتىپتى جولاۋشىلاردىڭ تەلەفونمەن سويلەسۋىنىڭ ءوزى الاڭداتاتىنىن ايتقان. زەرتتەۋگە سايكەس، تەلەفونمەن سويلەسۋ جۇرگىزۋشىنىڭ رەاكسياسىن ەكى ەسە تومەندەتەتىنى انىقتالدى.
جاۋاپ بەرگەندەردىڭ تاعى 14 پايىزى حابارلاما جازىپ، سەلفي جاساۋعا الاڭدايمىن دەپ جاۋاپ بەرگەن. ءاربىر بەسىنشى جۇرگىزۋشى ومىرىندە ءبىر رەت بولسا دا ءوزىن كولىك جۇرگىزىپ وتىرىپ، سۋرەتكە تۇسىرگەنىن مويىندادى.
ايتا كەتەيىك، جۇرگىزۋشىلەردىڭ 20 پايىزدان استامى كولىك قوزعالىسى كەزىندە ۇيالى تەلەفوندى قولدانادى، سولاردىڭ 75 پايىزى قوڭىراۋ شالادى نەمەسە قوڭىراۋعا جاۋاپ بەرەدى، ال 21 پايىزى حابارلاما جازادى.
ءاربىر ونىنشى قاتىسۋشى كولىك جۇرگىزۋ كەزىندە بالالار الاڭداتادى دەپ جاۋاپ بەرگەن. وسىعان بايلانىستى ماماندار اتا-انالارعا بالالارىنا جول قوزعالىسى ەرەجەلەرى تۋرالى ايتىپ وتىرۋعا كەڭەس بەرەدى. مىسالى، جۇرگىزۋشى جولدىڭ كەز كەلگەن جەرىنە توقتاي المايتىنى جايلى. سونىمەن قاتار ساپارعا شىعار الدىندا بالانىڭ قولىنا جاڭا ويىنشىق بەرىپ قويۋعا بولادى.
تاعى 10 پايىز قاتىسۋشى كولىك جۇرگىزۋ كەزىندە شىلىم شەگۋ ءۇشىن الاڭدايتىنىن ايتتى. شىلىمدى تۇتاتۋ ءۇشىن 1,5 سەكۋند ۋاقىت كەتەدى، ال بۇل ۋاقىتتىڭ ىشىندە ساعاتىنا 60 شاقىرىم جىلدامدىقپەن جۇرەتىن كولىك ورتا ەسەپپەن 30 مەتر جول جۇرەدى. ال قاراڭعى كەزدە وتتى تۇتاتۋ كوزدىڭ كورۋىنە كەدەرگى بولىپ، جول-كولىك وقيعاسىن تۋدىرۋى مۇمكىن. توعىز پايىز جۇرگىزۋشى راديوتولقىنداردى اۋىستىرۋ مەن جەلدەتكىشتى قوسۋدىڭ ءوزى الاڭداتادى، دەپ جاۋاپ بەرگەن.
ساۋالناماعا قاتىسقانداردىڭ سەگىز پايىزى تاماق جەۋ الاڭداتادى دەگەن جاۋاپتى تاڭدادى. ال بەس پايىزى كوڭىل كۇيى بولماعانى سەبەپتى ابايسىزدىق تانىتاتىنىن مويىنداعان. شاش تۇزەۋ مەن بەت بوياۋ دا الاڭداۋشىلىق تۋدىرادى، بۇل جاۋاپتى 3,5 پايىز جۇرگىزۋشى تاڭداعان. الايدا 20,2 پايىز قاتىسۋشى كولىك قۇرالىن باسقارۋ كەزىندە ءاردايىم مۇقيات ەكەنىن ايتتى.
