نۇرسۇلتان نازاربايەۆ ءال-فارابي اتىنداعى قازاق ۇلتتىق ۋنيۆەرسيتەتىنە كەلدى

الماتى. قازاقپارات - مەملەكەت باسشىسى نۇرسۇلتان نازاربايەۆ ءال-فارابي اتىنداعى قازاق ۇلتتىق ۋنيۆەرسيتەتىنە كەلدى. بۇگىن اتالعان وقۋ ورنىندا يننوۆاتسيالىق فورۋم وتۋدە.

شارا بارىسىندا مەملەكەت باسشىسى ۋنيۆەرسيتەت بازاسىندا جۇزەگە اسىرىلىپ جاتقان عىلىمي جوبالاردىڭ كورمەسىن تاماشالاپ، ءار جوباعا قاتىستى سۇراقتار قويدى.

ۋنيۆەرسيتەت رەكتورى اكادەميك عالىمقايىر مۇتانوۆ مەملەكەت باسشىسىن وقۋ ورنىنىڭ جەتىستىكتەرى مەن ۋنيۆەرسيتەت قابىرعاسىندا جۇزەگە اسىرىلىپ كەلە جاتقان مەديسينالىق- بيولوگيالىق يننوۆاتسيالىق كلاستەردىڭ جۇمىسىمەن تانىستىردى. ايتا كەتۋ كەرەك، اتالعان كلاستەر بويىنشا مەملەكەتتىك- جەكە ارىپتەستىك پرينتسيپ نەگىزىندە جوبالاردى جۇزەگە اسىرۋعا 500 ميلليون  ا ق ش دوللارى شاماسىندا قارجى تارتىلۋدا.

 ق ر مەملەكەت باسشىسى «قازاقستان-2050» ستراتەگياسىندا بىلىمگە نەگىزدەلگەن ەكونوميكاعا باسا نازار اۋدارعان. بۇل جەردە شەشۋشى ءرولدى ۋنيۆەرسيتەتتەر ويناۋى كەرەك. وسى باعىتتا قازىر ءال- فارابي اتىنداعى قازۇۋ جەمىستى جۇمىس جاساپ كەلەدى.

وقۋ ورنىندا يننوۆاتسيالىق باعىتتاعى العاشقى قادام رەتىندە وڭتۇستىك كورەيالىق ارىپتەستەرمەن بىرگە مەديتسينالىق دياگنوستيكالىق ورتالىقتىڭ اشىلۋىن ايتۋعا بولادى. جوباعا 1,2 ميلليارد تەڭگە ينۆەستيتسيا سالىندى.

ۋنيۆەرسيتەت بازاسىندا جانە ءبىر جوبا «ينجينيرينگ پەن عىلىمي قامتىمدى تەحنولوگيالار» يننوۆاتسيالىق كلاستەرىن قۇرۋ «الاتاۋ» ارنايى ەكونوميكالىق ايماعىمەن بىرگە جۇزەگە اسىرىلماق. تەحنوپارك پەن بيزنەس-ينكۋباتور، ع ز ي زەرتحانالىق كورپۋستارىنىڭ، ستۋدەنتتەر جاتاقحاناسىنىڭ قۇرىلىسىنا 9,5 ميلليارد تەڭگە كولەمىندە ينۆەستيتسيا سالۋ جوسپارلانۋدا.

اۆتور: گۇلميرا عوسمانالي