تاجىكتەر اعىلشىن ءتىلىن كينودان ۇيرەنبەك

استانا. قازاقپارات - تاجىك مەملەكەتتىك تەلەارناسى گولليۆۋد فيلمدەرىن سۋبتيترسىز (اۋدارماسىز) اعىلشىن تىلىندە كورسەتە باستادى. تەلەارنا وكىلدەرى جۇرتتىڭ اعىلشىن ءتىلىن تەزىرەك ۇيرەنۋى ءۇشىن فيلمدەردى اۋدارماسىز بەرىپ جاتقاندارىن ايتادى.

«ەكى- اق ءسوزىن ءتۇسىندىم»

مەملەكەتتىك تەلەارنالار كادر سىرتىنداعى اۋدارماشى داۋسى مەن تارجىمە ءماتىندى الىپ تاستاپ، كينونى تەك اعىلشىن تىلىندە كورسەتۋگە كوشكەندە مەحرانگەز كەيىپكەرلەردىڭ ديالوگىن ۇعىپ ۇلگەرمەگەن. « Hello (سالەم) جانە madame (مادام) دەگەن ەكى ءسوزدى عانا ءتۇسىندىم» دەيدى ول.

ءبىراق مەحرانگەز فيلمدى سوڭىنا دەيىن كورىپ شىققان. ول وسىلاي كورە بەرسەم، كۇندەردىڭ ءبىر كۇنى اعىلشىن كينولارىن قازىرگى ورىس تىلىندەگى فيلمدەردى تۇسىنگەندەي ەركىن ۇعاتىن بولامىن دەپ سەنەدى.

- تاجىك تەلەارناسىنان كوپتەگەن امەريكا فيلمدەرىن كوردىم، سولاردىڭ ىشىندە «ۇلى گەتسبي» اتتى جاڭا فيلم قاتتى ۇنادى. اعىلشىنداردىڭ، امەريكالىقتاردىڭ فيلمدەرىن ءتۇپنۇسقادان كورۋ ءبىزدىڭ اعىلشىن ءتىلىن ءتۇسىنۋىمىزدى جاقسارتادى دەپ ويلايمىن - دەيدى ول.

بىرنەشە اي بۇرىن تاجىك مەملەكەتتىك تەلەارناسى اعىلشىن تىلىندەگى كينولاردى ءتۇپنۇسقادان كورسەتە باستادى. قازىر ءۇش تەلەارنا گولليۆۋد (ا ق ش) جانە بولليۆۋد (ءۇندىستان) فيلمدەرىن بەيسەنبى جانە جەكسەندى كۇندەرى اۋدارماسىز كورسەتىپ جاتىر. ءسويتىپ ولار اعىلشىن تىلىنە قاتىستى بۇعان دەيىن بولماعان وزگەشە ناۋقان باستاپ وتىر.

تاجىكستاننىڭ «ءبىرىنشى» تەلەارناسى باسشىسىنىڭ ورىنباسارى كومرون سافاروۆ اعا بۋىن وكىلدەرىنىڭ جاستايىنان ورىس تىلىندەگى كينولاردى كورىپ وسكەنىن ايتادى. «سولايشا سوۆەت وداعى جاستارى ورىسشا جاقسى سويلەپ، تۇسىنەتىن بولدى» دەيدى ول.

سافاروۆتىڭ ايتۋىنشا، «قازىر ەلدە اعىلشىن ءتىلىن ۇيرەنۋگە نيەتتى جاستار كوبەيگەن». ول «وسى جاستارعا اعىلشىن ءتىلىن كۇندە قۇلاعىنا سىڭىرۋگە جاعداي جاساپ، اعىلشىن ءتىلىن مەڭگەرۋ پروتسەسىن تەزدەتۋ كەرەك. ادامدار ەستۋ ءارى كورۋ ارقىلى شەت ءتىلىن تەز ۇيرەنەدى» دەيدى.

پرەزيدەنتتىڭ تالابى

تاجىكستانداعى اعىلشىن ءتىلى وقىتۋشىلارى قاۋىمداستىعىنىڭ ءتوراعاسى پارۆون جامشەدتىڭ ايتۋىنشا، ء«قازىر تاجىكستان تۇرعىندارىنىڭ 5 پايىزى عانا اعىلشىنشا بىلەدى».

دەگەنمەن اعىلشىن ءتىلىن ۇيرەنگىسى كەلەتىن جاستار كوبەيگەن. بيىل ءتاجىكستان ورتا مەكتەبىنىڭ مىڭداعان وقۋشىسى ا ق ش كونگرەسى دەمەۋشىلىك جاسايتىن ستۋدەنت (وقۋشى) الماسۋ (FLEX) باعدارلاماسى ارقىلى ا ق ش مەكتەپتەرىندە وقۋعا ءوتىنىش بەرگەن. ولاردىڭ ىشىنەن 100 وقۋشى تالاپقا ساي بولىپ شىقتى.

تاجىكستاندا اعىلشىن تىلىنە سۇرانىس ارتقان سوڭ مەملەكەتتىك مەكتەپتەر مەن جەكە وقۋ ورتالىقتارىندا اعىلشىن ءتىلى كۋرستارى كوپ اشىلىپ جاتىر. ءبىراق جامشەد «ورتالىق ازيا ەلدەرىنىڭ قوعامدىق ومىرىندە اعىلشىن ءتىلدى ورتامەن ارالاسۋ مۇمكىندىگى از» ەكەنىن ەسكەرتەدى.

- قازىر ءتىل ۇيرەتەتىن ورتالىقتار مەن اعىلشىنشا وقىتاتىن ج و و كوپ. ءبىراق اعىلشىن تىلىندە قارىم- قاتىناس جاسايتىندار از، ءتىل ۇيرەنۋشىلەر فيلم كورۋ ارقىلى عانا داعدىسىن جەتىلدىرە الادى، - دەيدى ول.

تاجىكستان تەلەارنالارىنان كورسەتىلەتىن شەتەلدىك فيلمدەردىڭ كوبى رەسەيدە ورىس تىلىندە دىبىستالىپ، بۇل ەلگە رەسەي نارىعى ارقىلى كەلەدى. ورىس ءتىلى كوپتەگەن جىلدار بويى تاجىكتەردىڭ ەكىنشى ءتىلى سانالىپ كەلدى، سوندىقتان ونى مۇنداعى جۇرت كوپ قينالماي تۇسىنەدى.

ءبىراق ەل پرەزيدەنتى ەمومالي راحمون «ءار ازامات اعىلشىن، ورىس جانە انا ءتىلىن ءبىلۋى ءتيىس» دەپ مالىمدەدى. سافاروۆتىڭ ايتۋىنشا، وسىدان سوڭ اعىلشىن تىلىندەگى فيلمدەردى كورسەتۋ ۇسىنىسى تىكەلەي پرەزيدەنت كەڭسەسىنەن تۇسكەن.

 ەلدەگى مەملەكەتتىك تەلەارنالاردىڭ باسشىلارى «بولاشاقتا اعىلشىن جانە ورىس تىلىندەگى كينولاردى كورسەتۋ ۋاقىتىن قاتار ارتتىرامىز» دەيدى. ءبىراق ولار بۇل شارانىڭ قاشان جانە قالاي ىسكە اسىرىلاتىنى تۋرالى ەگجەي- تەگجەيلى ايتپادى.

(زارانگەزي ناۆرۋزشونىڭ ماقالاسىن اعىلشىن تىلىنەن اۋدارعان - دينارا ءالىمجان)

«ازاتتىق»