قازاقستاننىڭ ءبىرقاتار ايماعىندا ەسكەرتۋ جاريالاندى

استانا. قازاقپارات - قازاقستاننىڭ ءبىرقاتار وبلىسىندا ەسكەرتۋ جاريالاندى، دەپ حابارلادى «قازگيدرومەت» ر م ك.

8- جەلتوقساندا استانادا، سينوپتيكتەردىڭ بولجامىنشا، تۇندە اۋا تەمپەراتۋراسى 30-گرادۋسقا تومەندەدى. وڭتۇستىك قازاقستان، جامبىل، الماتى وبلىستارىندا سىناپ باعاناسى تۇندە  20-25-، كەي جەرلەردە 30 ايازدى كورسەتتى. 8-9- جەلتوقساندا قاراعاندى، شىعىس قازاقستان وبلىستارىندا اۋا تەمپەراتۋراسى تومەندەيدى، كەي جەرلەردە بۇل كورسەتكىش 30-35- گرادۋس ايازعا جەتپەك.

قازاقستاننىڭ باسىم اۋماعىندا كۇن قۇبىلمالى بولادى. قار جاۋادى، اسىرەسە ەلدىڭ وڭتۇستىك-شىعىسىندا، كەي جەرلەردە تۇمان، كوكتايعاق بولىپ، جەل كۇشەيىپ، بوران سوعۋى مۇمكىن. قازاقستاننىڭ وڭتۇستىگى مەن باتىسىندا عانا جاۋىن-شاشىن جاۋمايدى.

اقمولا، شىعىس قازاقستان، كۇندىز پاۆلودار وبلىستارىندا كەي جەرلەردە جەل 15-20 م/س دەيىن كۇشەيىپ، بوران سوعادى دەپ كۇتىلۋدە. سولتۇستىك قازاقستان، قوستاناي وبلىستارىندا كەي جەرلەرىندە تۇمان بولىپ، جەلدىڭ جىلدامدىعى 15-20 م/س جەتىپ، بوران سوعۋى ىقتيمال. الماتى، جامبىل وبلىستارىنىڭ كەي اۋماقتارىندا تۇمان، كوكتايعاق، تۇندە جەل 18-23 م/س دەيىن كۇشەيىپ بوران بولادى.  قىزىلوردا، ماڭعىستاۋ، اتىراۋ، تاڭەرتەڭ جانە كۇندىز وڭتۇستىك قازاقستان وبلىستارىندا جەل جىلدامدىعى 15-20 م/س جەتەدى.