فرانسيا پرەزيدەنتى قازاقستاننان قايتار جولدا ماسكەۋگە جوسپارلانباعان ساپار جاسادى

استانا. قازاقپارات - سەنبى كۇنى فرانسيا پرەزيدەنتى فرانسۋا وللاند قازاقستاننان قايتار جولدا ماسكەۋگە قىسقا ۋاقىتتى جوسپارلانباعان ساپار جاسادى، دەپ حابارلايدى ۋترو. رۋ.

«ۆنۋكوۆو-2» اۋەجايىندا ول رەسەي مەملەكەتىنىڭ باسشىسى ۆلاديمير پۋتينمەن كەزدەستى.

ۆ. پۋتين فرانسيالىق ارىپتەسىنە ساپار ءۇشىن ۋاقىت تاپقانى ءۇشىن العىسىن ايتىپ، بۇل كەزدەسۋدىڭ ۋكرايناداعى داعدارىستى شەشۋگە پايدا اكەلەتىنىنە سەنىمىن ءبىلدىردى. «پروبلەمالار كۇردەلى، ولاي بولعانىمەن ءبىزدىڭ وسىعان بايلانىستى جۇرگىزگەن تالقىلاۋىمىز بەلگىلى ءبىر وڭ ناتيجەسىن بەرۋدە. مەن ءسىزدىڭ بۇگىنگى قىسقا جۇمىس ساپارىڭىز كوپتەگەن پروبلەمالاردى شەشۋگە پايداسىن تيگىزەتىنىنە سەنىمدىمىن»، - دەدى ف. وللاندپەن كەزدەسۋدى اشۋ كەزىندە رەسەي پرەزيدەنتى.

ءوز كەزەگىندە وللاند پۋتينگە قابىلداۋ ءۇشىن العىسىن ايتىپ، رەسەي مەن فرانسيانىڭ ەكىجاقتى قارىم- قاتىناستارىنداعى بوگەتتەردەن وتە الاتىنىنا سەنىمىن ءبىلدىردى. «مەن ءبىر كەزدەرى وسىنداي بوگەتتەردى، ارامىزدا بوي كوتەرەتىن قابىرعالاردى بۇزۋ كەرەك دەپ ويلايمىن جانە وسىنى جاساي الامىز دەپ سەنەمىن»، - دەپ اتاپ ءوتتى فرانسيا باسشىسى.

ۋكراينا تۋرالى ايتا وتىرىپ، وللاند: «ءبىزدىڭ «جيىرمالىق» اياسىندا باستاعان پىكىرتالاسىمىزدى جالعاستىرۋ قاجەت. رەسەي، فرانسيانىڭ وعان تالپىنىسى بار، ولار وسىنى تىلەيدى. التىنشى ماۋسىمدا ءبىز شەشىمدەردى تاۋىپ، بىرگە جۇمىس ىستەۋ قاجەتتىلىگى تۋرالى ايتتىق. ءبىز انگەلا مەركەلمەن سويلەستىك. رەسەي مەن فرانسيا قاجەتتى شەشىم تابا الادى دەپ ويلايمىز»، - دەدى.

كەزدەسۋدەن كەيىن پۋتين تىلشىلەرگە «ميسترال» تاقىرىبىنىڭ قوزعالماعانىن ايتتى. «ميسترال» تۋرالى سويلەسپەدىك، ول تۋرالى ءسوز بولمادى. كەلىسىم- شارت بار، بۇل زاڭدى قۇجات، ول ورىندالادى. مەن پرەزيدەنتكە ەشقانداي سۇراقتار قويمادىم، ەشتەڭە ايتپادىم دا»، - دەدى رەسەيلىك كوشباسشى.

ەگەر كەلىسىم- شارت بۇزىلسا، رەسەيدىڭ فرانسياعا ەرەكشە نارازىلىعى بولمايدى، ءبىراق ول بۇعان دەيىن الدىن الا تولەنگەن اقشاسىن قايتارۋعا ءۇمىتتى.

 «ءبىز بۇل تاقىرىپتاعى وقيعالاردىڭ كەز كەلگەن دامۋ جەلىسىنە تۇسىنىستىكپەن قاراۋدامىز جانە قارايتىن بولامىز»، - دەپ تۇيىندەدى ۆ. پۋتين. 

ەستەرىڭىزگە سالا كەتەيىك، بۇرىنعى جاسالعان كەلىسىمدەر  بويىنشا پاريج ماسكەۋگە «ميسترال» اتتى تىك ۇشاق تاسيتىن ەكى كەمەنى بەرمەسە، وندا فرانسيا رەسەيگە 3 ميلليارد دوللار تولەۋگە ءماجبۇر بولادى. كەلىسىمشارتتىڭ العاشقى بولىمىنە سايكەس، فرانسۋزدار ەكىنشى تاراپقا «ۆلاديۆوستوك» كەمەسىن قاراشانىڭ ون تورتىندە بەرۋ ءتيىس ەدى. الايدا تەحنيكا يەسى ءدال سوڭعى كەزدە اينىپ قالدى. فرانسۋا وللاند: «اتالعان كەلىسىمشارتتىڭ نەگىزگى تالابى ۋكراينا شىعىسىنداعى قارۋلى قاقتىعىستاردىڭ اياقتالۋى بولىپ سانالادى»، - دەپ، وسىعان دەيىن سان مارتە ايتقان بولاتىن.

 بۇعان جاۋاپ رەتىندە رەسەيدىڭ قورعانىس مينيسترلىگى «سىزدەردى سوتقا بەرەمىز» دەپ ەسكەرتكەن.