اتىراۋدا ازەربايجاندىق اكادەميكتىڭ قازاق تىلىندە جارىق كورگەن كىتابىنىڭ تۇساۋى كەسىلدى
قازاقستانداعى ازەربايجاننىڭ بيزنەس- ينۆەستيتسيالار قاۋىمداستىعىنىڭ قولداۋىمەن، اتىراۋ قالاسىنداعى ازەربايجاننىڭ باس كونسۋلدىعىنىڭ باستاماسىمەن شىعارىلعان كىتاپ ەلدىڭ مەملەكەتتىك قۇرىلىمدارى مەن قوعامداستىعىنىڭ زور قىزىعۋشىلىعىن تۋدىردى.
شارادا ءسوز العان اتىراۋ مەملەكەتتىك ۋنيۆەرسيتەتىنىڭ رەكتورى، پروفەسسور بەيبىت مامىرايەۆ «ازەربايجان 2003-2008: ءداۋىر تۋرالى ويلار» شىعارماسىنا قاتىستى ءوز ويلارىن ءبىلدىردى. ول مۇندا نەگىزىن ازەربايجان حالقىنىڭ كوشباسشىسى گەيدار اليەۆ قالاعان قازىرگى مەملەكەتتىلىكتى نىعايتۋ ۇردىستەرى، ەلدىڭ دامۋى جولىندا قول جەتكىزگەن تابىستارى، مەملەكەتتىك قازىرگى پرەزيدەنتى يلحام اليەۆ جۇرگىزىپ وتىرعان تابىستى ىشكى جانە سىرتقى ساياسات ت. س. س. ماسەلەلەرگە كەڭىنەن تالدام جاسالعانىنا توقتالدى. سونداي- اق ەڭبەكتە ازەربايجاننىڭ تاۋەلسىزدىك العاننان كەيىنگى العاشقى قادامدارى، دەموكراتياعا، نارىقتىق ەكونوميكاعا بەت الۋ جولدارى، ەكونوميكانى جاڭعىرتۋى، مىقتى مەملەكەت قۇرۋداعى ارەكەتتەرى تۋرالى ايتىلعان. بۇل ازەربايجاندى ءبىلىپ- تانۋعا ۇمتىلاتىن قازاقستاندىق زيالى قاۋىم وكىلدەرى مەن جاس عالىمدار ءۇشىن ماڭىزدى.
باس كونسۋل راشاد مامەدوۆ كىتاپتىڭ قازاقستان جۇرتشىلىعىنا، ونىڭ ىشىندە زيالى قاۋىم وكىلدەرىنە، عالىمدار مەن مەملەكەتتىك قىزمەتكەرلەرگە ازەربايجاننىڭ دامىپ، نىعايۋى جولىنداعى جەتىستىكتەرى، ىشكى جانە سىرتقى ساياساتىنىڭ باعىتتارى تۋرالى جەتكىزۋدە ءمانى زور ەكەنىن ايتتى. شىعارمانىڭ قازاق تىلىنە اۋدارىلۋىنا دا مىنە، وسى تۇرتكى بولعان.
بۇل كىتاپ قازاقستاننىڭ باتىس وڭىرىندەگى كوپتەگەن كىتاپحانالارعا، جوعارى وقۋ ورىندارى مەن مەملەكەتتىك ۇيىمدارعا تاراتىلدى.
