اقتاۋدا اققۋلار اشتان قاتۋدا

استانا. قازاقپارات- اقتاۋلىقتار قالانىڭ باستى نىشانى - اققۋلاردان ايىرىلىپ قالۋى مۇمكىن. بيىل قىستىڭ قاتتى بولاتىنىن ەسكەرگەن ەكولوگتار وسىلاي دەپ دابىل قاعىپ جاتىر.

جالپى كاسپيي تەڭىزىندە جىل سايىن 12 مىڭعا جۋىق قۇس پاديشاسى قىستاپ شىعادى. كوبى قاراكولدە تۇراقتايدى. اقتاۋعا سونىڭ تەك قىرىققا جۋىعى عانا كەلەدى.

اققۋدىڭ بۇل توبىنىڭ وسى ايدىندى پانالاپ جۇرگەنىنە دە 30 جىلعا تاياعان. ءبىراق سوڭعى جىلدارى ولاردىڭ دا كەلۋى سيرەپ كەتتى. وعان جەمنىڭ جوقتىعى سەبەپ. قازىر اققۋلاردى قورەكتەندىرەتىن تەك جەرگىلىكتى تۇرعىندار مەن قالا قوناقتارى عانا. نان، جەمىس- جيدەك، كوكونىس اكەلىپ بەرىپ، تەربەلىسىن تاماشالاپ كەتەدى. الايدا، كۇن سۋىتا قالسا، ادامدار جاعالاۋعا بەتتەمەيدى. تەڭىزدىڭ سۋى قاتىپ اققۋلار تابيعي قورەكتەن تاعى قاعىلادى. ال قاسيەتتى قۇستى جەمدەۋ زاڭ بويىنشا جەرگىلىكتى اتقارۋشى ورگانعا جۇكتەلگەن. ءبىراق، ولار بۇكىل كاسپي جاعالاۋىنداعى اققۋلاردى ازىقپەن قامتىماق تۇگىلى، قالاعا كەلەتىن از بولىگىنە قامقور بولا الماي وتىر.

ادىلبەك قوزىباقوۆ، ەكولوگ:

- ولاردى ەشكىم جەمدەمەي، ولاردى ادامدار ۇركىتەتىن بولسا، ايىرىلىپ قالۋىمىز مۇمكىن. سوندىقتان مەملەكەت تاراپىنان دا شارالار ۇيىمداستىرۋى كەرەك.

«KTK» ارناسى