اڭىز- داستان «قورقىتتىڭ كورى» كورەرمەنگە جول تارتتى

استانا. قازاقپارات- الماتىداعى م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا تاعى ءبىر جاڭا سپەكتاكلدىڭ تۇساۋى كەسىلدى.

قازاقتىڭ ءبىرتۋار اقىنى ماعجان تۋرالى قويىلىمنان كەيىن ۇزاق ۋاقىت وتپەستەن، يران- عايىپتىڭ اڭىز- داستانى جەلىسىندە ساحنالانعان «قورقىتتىڭ كورى» كورەرمەنگە جول تارتتى. جاڭا تۋىندىنىڭ قويۋشى- رەجيسسەرى - ليتۆادا كەلگەن يوناس ۆايتكۋس.

- توپىراقتى باسىنىپ، قارا جەردى سۋ الدى.

ەكى اياقتى، جۇمىر باستىنىڭ زارە- قۇتىن ۇشىرىپ،

سالىپ تۋدىم ىلاڭدى.

مەن كەلگەن سوڭ سەسكەندى مە، ەس كوردى مە زاتىمدى،

قورقىت قويدى ەل اتىمدى.. .

بۇل بۇكىل شىعىس وركەنيەتىنىڭ ىرگەتاسىن قالاۋعا كۇش سالعان ۇلى تۇلعالاردىڭ ءبىرى. ونىڭ ءرولىن اكتەر دۋلىعا اقمولدا وينادى. قورقىتتىڭ تامسىلدەرىن وقي وتىرىپ، كوز الدىمىزعا جەر ورتاسىنان اسقان اقساقال ەلەستەيتىنى ءسوزسىز. دەگەنمەن الاشقا اتى ءماشھۇر تۇلعا بار بولعانى 40  جىل ءومىر سۇرگەن.

ەركىن جۋاسبەك، م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى:

 -  قورقىت -  بۇكىل تۇركى الەمىنىڭ باباسى. بۇدان 20-30 جىل بۇرىن جازىلعان شىعارما بولعانىمەن، بۇگىنگى كۇنمەن ۇندەسەتىن، ونداعى كوكەيكەستى ماسەلەلەر، ءومىر مەن ءولىم اراسىنداعى، جالپى، ادام بالاسىنىڭ بۇل دۇنيەگە نە ءۇشىن كەلەتىنى تۋرالى وي تولعايتىن سپەكتاكل.

ءبىر ەرەكشەلىگى، ليريكالىق درامانىڭ اۆتورى يران- عايىپ سپەكتاكلگە ءوزى دە قاتىسقان. تەاتردىڭ مارتەبەلى مەيماندارى اۆتوردىڭ رولدە وينايتىنىن كۇتپەسە كەرەك. مۇندا جەرۇيىق ىزدەپ جورتىپ وتكەن قورقىتتىڭ زامانى مەن بۇگىنگى كۇن استاسىپ جاتىر. جارى - سارىن ارۋدى قوبىزشى قۇدىرەتتى ونەرىمەن باۋراپ العان دەسەدى.

- قورقىت تارتقان قوبىز كۇي،

تىلسىم ءۇنى.. .

ءتاتتى ۇيىعىنا تارتىپ بارادى.

كورەمەي- بىلمەي قۇدىرەتىڭە ىنتىزارىم ارتىپ بارادى.. .

پەسا پروزا ەمەس، پوەزيا تىلىندە جازىلىپتى. اكتەرلەر دە ءتىلىمىزدىڭ پوەتيكالىق بوياۋى مەن ءماتىننىڭ ىرعاعىن جوعالتپاي جەتكىزە بىلگەن. قويلىمعا جالپى سانى 30 ءارتىس قاتىستى. مۇنداعى ءدىني نانىم- سەنىمدەر ادامزات ساناسىنىڭ دامۋ دەڭگەيىن كورسەتەدى. ال قورقىتتىڭ جانىن الۋعا كەلگەن قىزىل قانات ازىرەيىلدىڭ رولىندە شىنار جانىسبەكوۆا وينادى.

- جاۋابى جوق سۇراقسىڭ،

جانىنا راقىمى تۇسپەيتىن

نەتكەن ساراڭ شۇناقسىڭ؟

اشىپ قارا كوزىڭدى.

بار- جوعىڭ قىرىقتا،

پەرعاۋىنشا سەزىنەسىڭ ءوزىڭدى.. .

 جالپى، قويىلىم وقيعاسى مۇحاممەد پايعامبار زامانىنا جاقىن تۇستا، بايات، ياعني، قازىرگى سىرداريا وزەنى بويىندا وتكەن. «قورقىتتىڭ كورى» -  تالعامى بيىك كورەرمەنگە ارنالعان تۋىندى.

«KTK» ارناسى