ق ر ۇلتتىق بانكىنىڭ بانكنوتتارى قاتارىنان ءۇشىنشى جىل «جىلدىڭ ۇزدىك بانكنوتى» اتاعىن جەڭىپ الدى

الماتى. قازاقپارات - ق ر ۇلتتىق بانكىنىڭ بانكنوتتارى ءۇشىنشى جىل قاتارىنان «جىلدىڭ ۇزدىك بانكنوتى» اتاعىن جەڭىپ الدى، دەپ حابارلادى بانكتىڭ باسپا ءسوز قىزمەتى.

كەشە شۆەيساريانىڭ لوزاننا قالاسىندا ق ر ۇلتتىق بانكىنىڭ وكىلدەرى «جىلدىڭ ۇزدىك بانكنوتى» اتالىمىندا ماراپاتقا يە بولدى. حالىقارالىق بانكنوتتىق قاۋىمداستىق  (International Bank Note Society)  «كۇلتەگىن» تۇركى جازباسىنا ارنالعان 1000 تەڭگەلىك نومينالداعى ەستەلىك بانكنوتتى ۇزدىك دەپ تاپتى.

نومينانتتار قاتارىندا ا ق ش دوللارى (نومينالى 100 دوللار بانكنوتى) ، ەۋرو (5 ەۋرو) ، كانادالىق دوللار (10 دوللار) ، رەسەي رۋبلى (100 رۋبل) ، برازيليالىق رەال (5 رەال) ، ليۆيالىق دينار (5 دينار) ، سونىمەن بىرگە يسلانديا، ليۆان، سولومون ارالدارى، باربادوس، فييدجي بانكنوتتارى قاتىستىرىلدى.

كونكۋرستى ۇيىمداستىرۋشىلار قازاقستان بانكنوتتارىنىڭ ۇنەمى ارتا تۇسكەن ساپاسىمەن جانە جوعارى سەنىمدى قورعالۋىمەن حالىقارالىق بانكنوت قاۋىمداستىعىنىڭ ساراپشىلارىن تاڭعالدىرىپ وتىرعانىن اتاپ ءوتتى. ەسكە سالا كەتەيىك، 2011 - جىلى نومينالى 10 مىڭ تەڭگەلىك، ال 2012 - جىلى - 5 مىڭ تەڭگەلىك بانكنوتتار ۇزدىك دەپ تانىلعان بولاتىن.

 شارا اۋقىمىندا قازاقستاننىڭ دامۋ تاريحىن بەينەلەيتىن كورمە ۇيىمداستىرىلدى.