كوشپەلىلەر مادەنيەتىنىڭ الەمدىك مۇراعا قوسقان ۇلەسى زور - ف. وللاند

الماتى. قازاقپارات - كوشپەلىلەر مادەنيەتىنىڭ الەمدىك مۇراعا قوسقان ۇلەسى زور. بۇل تۋرالى بۇگىن الماتىدا «عىلىم ورداسى» ر م ك عيماراتىندا عالىمدار الدىندا سويلەگەن سوزىندە فرانسيا پرەزيدەنتى فرانسۋا وللاند مالىمدەدى.

«قازاقستاندا مادەنيەت ەرەكشە مانگە يە. جالپى، كوشپەلىلەر مادەنيەتىنىڭ الەمدىك ورتاق مۇراعا قوسقان ۇلەسى زور. بۇل جەردە فيلوسوفيا، پوەزيا، ماتەماتيكا سالالارىن ەرەكشە اتاپ وتۋگە بولادى. ۇلى عۇلاما ءابۋ ناسىر ءال-فارابي اريستوتەلدەن كەيىنگى «ەكىنشى ۇستاز» اتاندى. ال ۇلى اقىن ابايدى بۇگىندە ماماندار فرانسيا اقىنى ۆيكتور گيۋگومەن سالىستىرادى. سوندىقتان، قازاقستاننىڭ مادەنيەتى دە فرانسيا جەرىندە تارالۋى ءتيىس. قازاقستاننىڭ مادەنيەتى - وتە باي. سوندىقتان، سىزدەر ونى كوزدىڭ قاراشىعىنداي ساقتاپ، ماقتان تۇتۋلارىڭىز كەرەك»، - دەدى فرانسۋا وللاند.

سونىمەن قاتار، فرانسيا پرەزيدەنتى تۋريزم مەن سپورت سالاسىندا دا ەكى ەل اراسىنداعى ءوزارا ىنتىماقتاستىقتى دامىتۋ كەرەكتىگىن ايتتى.

«قازاقستان تۋريزم ورتالىعىنا اينالۋى ءتيىس. قازاقستاننىڭ وسى سالانى دامىتۋدا الەۋەتى ۇلكەن. قازاقتىڭ ەۋروپالىقتاردى ءتانتى ەتەتىن ۇلان-عايىر دالاسى، كەرەمەت تاۋ سىلەمدەرى بار. بۇل قازاقستان ءۇشىن باعا جەتپەس قۇندىلىقتار. بۇل جەردە تۋريستىك ينفراقۇرىلىمداردى دامىتۋدا فرانسۋزدىق ارىپتەستەرگە ارقا سۇيەۋگە بولادى. سونداي-اق، الماتىدا 2017-جىلى قىسقى ۋنيۆەرسيادا وتەدى. سونىمەن قاتار، قازاقستان 2022-جىلعى قىسقى وليمپيادا ويىندارىن وتكىزۋگە دە ءۇمىت ارتىپ وتىر. بۇلار - بۇكىل ەلدى ورتاق ىسكە جۇمىلدىرا الاتىن ماڭىزدى جوبالار. ءبىز بۇل جەردە دە جان-جاقتى كومەك كورسەتۋگە دايىنبىز»، - دەدى فرانسۋا وللاند.

اۆتور: جاپپاربەرگەن ايبوتا